chahat ka izhaar kiya so apna kaam KHarab hua

chāhat kā iz.hār kiyā so apnā kaam ḳharāb huā

us parde ke uTh jaane se us ko ham se hijāb huā

saarī saarī rāteñ jaage ijz-o-niyāz-o-zārī kī

tab jā kar milne kā us ke sub.h ke hote javāb huā

kyā kahiye mahtāb meñ shab kī vo bhī Tuk aa baiThā thā

tāb-e-ruḳh us mah ne dekhī sau darje be-tāb huā

sham.a jo aage shaam ko aa.ī rashk se jal kar ḳhaak huī

subah-e-gul-tar sāmne ho kar josh sharm se aab huā

marte na the ham ishq ke rafta be-kafanī se ya.anī 'mīr'

der mayassar is aalam meñ marne kā asbāb huā

chahat ka izhaar kiya so apna kaam KHarab hua

us parde ke uTh jaane se us ko hum se hijab hua

sari sari raaten jage ijz-o-niyaz-o-zari ki

tab ja kar milne ka us ke subh ke hote jawab hua

kya kahiye mahtab mein shab ki wo bhi Tuk aa baiTha tha

tab-e-ruKH us mah ne dekhi sau darje be-tab hua

shama jo aage sham ko aai rashk se jal kar KHak hui

subah-e-gul-tar samne ho kar josh sharm se aab hua

marte na the hum ishq ke rafta be-kafani se yani 'mir'

der mayassar is aalam mein marne ka asbab hua