dekh aarsi ko yar hua mahw naz ka

dekh aarsī ko yaar huā mahv naaz kā

ḳhāna-ḳharāb hojiyo ā.īna-sāz kā

hotā hai kaun dast-basar vaañ ġhurūr se

gaalī hai ab javāb salām-e-niyāz kā

ham to samand-e-nāz ke pāmāl ho chuke

us ko vahī hai shauq abhī turk-tāz kā

hai kīmiyāgarān-e-mohabbat meñ qadr-e-ḳhāk

par viqr kuchh nahīñ hai dil-e-be-gudāz kā

is lutf se na ġhuncha-e-nargis khilā kabhū

khulnā to dekh is mizha-e-nīm-bāz kā

kotāh thā fasāna jo mar jaate ham shitāb

jī par vabāl sab hai ye umr-e-darāz kā

maarā na apne haath se mujh ko hazār-haif

kushta huuñ yaar maiñ to tire imtiyāz kā

hiltī hai yuuñ palak ki gaḌī dil meñ jaa.e hai

andāz dīdanī hai mire dil-navāz kā

phir 'mīr' aaj masjid-e-jāme ke the imaam

dāġh-e-sharāb dhote the kal jā-namāz kā

dekh aarsi ko yar hua mahw naz ka

KHana-KHarab hojiyo aaina-saz ka

hota hai kaun dast-basar wan ghurur se

gali hai ab jawab salam-e-niyaz ka

hum to samand-e-naz ke pamal ho chuke

us ko wahi hai shauq abhi turk-taz ka

hai kimiyagaran-e-mohabbat mein qadr-e-KHak

par wiqr kuchh nahin hai dil-e-be-gudaz ka

is lutf se na ghuncha-e-nargis khila kabhu

khulna to dekh is mizha-e-nim-baz ka

kotah tha fasana jo mar jate hum shitab

ji par wabaal sab hai ye umr-e-daraaz ka

mara na apne hath se mujh ko hazar-haif

kushta hun yar main to tere imtiyaz ka

hilti hai yun palak ki gaDi dil mein jae hai

andaz didani hai mere dil-nawaz ka

phir 'mir' aaj masjid-e-jame ke the imam

dagh-e-sharab dhote the kal ja-namaz ka