gharib-e-shahr-e-KHuban hun mera kuchh haal mat puchho

ġharīb-e-shahr-e-ḳhūbāñ huuñ mirā kuchh haal mat pūchho

huā jī zulf-o-kākul ke liye janjāl mat pūchho

dil-e-sad-pāra ko paivand kartā huuñ judā.ī meñ

kare hai kohna-nusḳha vasl juuñ vassāl mat pūchho

jigar jal kar huā hai ko.elā betāb to bhī huuñ

tapish se dil kī mere sar pe hai dhamāl mat pūchho

ta.ajjub hai ki dil is ganj-e-sar-gashta meñ rahtā hai

ḳharābe jis se ye paate haiñ mālā-māl mat pūchho

lagā jī us kī zulfoñ se bahut ham 'mīr' pachhtā.e

huā hai mudda.ī ek ek apnā baal mat pūchho

gharib-e-shahr-e-KHuban hun mera kuchh haal mat puchho

hua ji zulf-o-kakul ke liye janjal mat puchho

dil-e-sad-para ko paiwand karta hun judai mein

kare hai kohna-nusKHa wasl jun wassal mat puchho

jigar jal kar hua hai koela betab to bhi hun

tapish se dil ki mere sar pe hai dhamal mat puchho

tajjub hai ki dil is ganj-e-sar-gashta mein rahta hai

KHarabe jis se ye pate hain mala-mal mat puchho

laga ji us ki zulfon se bahut hum 'mir' pachhtae

hua hai muddai ek ek apna baal mat puchho