girdab-war yar tere sadqe jaiye

girdāb-vār yaar tire sadqe jā.iye

dariyā kā pher pā.iye terā na pā.iye

sar maar maar baiThe talaf hoje kab talak

Tuk uTh ke ab nasīboñ ko bhī āzmā.iye

sau shakl se ham aa.e ga.e terī bazm meñ

tanzan kahā na tū ne kabhū yuuñ ki ā.īye

aa.e haiñ tang jaan se qaid-e-hayāt meñ

is band se hamāre ta.iiñ ab chhuḌā.īye

kahne lagā ki TeḌhe bahut ho rahe ho tum

do chaar sīdhī sīdhī tumheñ bhī sunā.iye

hai azm-e-jazm tark-o-tajarrud kā gar bane

kyā is jahān-e-sifla se dil ko lagā.iye

tāsīr hai duā ko faqīroñ kī 'mīr' jī

Tuk aap bhī hamāre liye haath uThā.iye

girdab-war yar tere sadqe jaiye

dariya ka pher paiye tera na paiye

sar mar mar baiThe talaf hoje kab talak

Tuk uTh ke ab nasibon ko bhi aazmaiye

sau shakl se hum aae gae teri bazm mein

tanzan kaha na tu ne kabhu yun ki aaiye

aae hain tang jaan se qaid-e-hayat mein

is band se hamare tain ab chhuDaiye

kahne laga ki TeDhe bahut ho rahe ho tum

do chaar sidhi sidhi tumhein bhi sunaiye

hai azm-e-jazm tark-o-tajarrud ka gar bane

kya is jahan-e-sifla se dil ko lagaiye

tasir hai dua ko faqiron ki 'mir' ji

Tuk aap bhi hamare liye hath uThaiye