ek aadh din nikal mat ai abr idhar se ho kar

ik aadh din nikal mat ai abr idhar se ho kar

baiThā huuñ maiñ abhī Tuk saarā jahāñ Dubo kar

ab kal nahīñ hai tujh ko be-qatl ġham-kashoñ ke

kahte to the ki zālim ḳhūñ-rezī se na ḳhū kar

kahte haiñ raah paa.ī zāhid ne us galī kī

rotā kahīñ na aave īmān-o-dīñ ko kho kar

hai nazm kā salīqa har-chand sab ko lekin

jab jāneñ koī laave yuuñ motī se piro kar

kyā ḳhuub zindagī kī duniyā meñ shaiḳh jī ne

ta.abīr karte haiñ sab ab un ko murda-sho kar

go tere hoñT zālim āb-e-hayāt hoñ ab

kyā ham ko jī kī baiThe ham jī se haath dho kar

kis kis adā se fitne karte haiñ qasd idhar kā

jab be-dimāġh se tum uTh baiThte ho so kar

TukḌe jigar ke mere mat chashm-e-kam se dekho

kāḌhe haiñ ye javāhir dariyā ko maiñ bilo kar

ahvāl 'mīr' jī kā mutlaq gayā na samjhā

kuchh zer-e-lab kahā bhī so der der ro kar

ek aadh din nikal mat ai abr idhar se ho kar

baiTha hun main abhi Tuk sara jahan Dubo kar

ab kal nahin hai tujh ko be-qatl gham-kashon ke

kahte to the ki zalim KHun-rezi se na KHu kar

kahte hain rah pai zahid ne us gali ki

rota kahin na aawe iman-o-din ko kho kar

hai nazm ka saliqa har-chand sab ko lekin

jab jaanen koi lawe yun moti se piro kar

kya KHub zindagi ki duniya mein shaiKH ji ne

tabir karte hain sab ab un ko murda-sho kar

go tere honT zalim aab-e-hayat hon ab

kya hum ko ji ki baiThe hum ji se hath dho kar

kis kis ada se fitne karte hain qasd idhar ka

jab be-dimagh se tum uTh baiThte ho so kar

TukDe jigar ke mere mat chashm-e-kam se dekho

kaDhe hain ye jawahir dariya ko main bilo kar

ahwal 'mir' ji ka mutlaq gaya na samjha

kuchh zer-e-lab kaha bhi so der der ro kar