ishq-e-bala-pur-shor-o-shar ne jab maidan mein KHam mara

ishq-e-balā-pur-shor-o-shar ne jab maidān meñ ḳham maarā

paak huī kushtī aalam kī aage kin ne dam maarā

būd-nabūd kī apnī haqīqat likhne ke shā.ista na thī

bātil saf.ha-e-hastī par maiñ ḳhat khīñchā qalam maarā

ġhair ke mere mar jaane meñ tafāvut arz-o-samā kā hai

maarā un ne donoñ ko lekin mujh ko kar ke sitam maarā

un bāloñ se tilism-e-jahāñ kā dar basta thā goyā sab

zulfoñ ko darham un ne kiyā so aalam ko barham maarā

duur us qibla-rū se mujh ko jald raqīb ne maar rakhā

qahr kiyā us kutte ne kyā dauḌ ke said-e-haram maarā

kaaT ke sar aajiz kā un ne aur bhī pagḌī pher rakhī

faḳhr kī kaun sī jāgah thī yaañ aisā kyā rustam maarā

jis mizmār meñ rustam kī bhī raah na niklī 'mīr' kabhū

us maidāñ kī ḳhaak pe ham ne jur.at kar ke qadam maarā

ishq-e-bala-pur-shor-o-shar ne jab maidan mein KHam mara

pak hui kushti aalam ki aage kin ne dam mara

bud-nabud ki apni haqiqat likhne ke shaista na thi

baatil safha-e-hasti par main KHat khincha qalam mara

ghair ke mere mar jaane mein tafawut arz-o-sama ka hai

mara un ne donon ko lekin mujh ko kar ke sitam mara

un baalon se tilism-e-jahan ka dar basta tha goya sab

zulfon ko darham un ne kiya so aalam ko barham mara

dur us qibla-ru se mujh ko jald raqib ne mar rakha

qahr kiya us kutte ne kya dauD ke said-e-haram mara

kaT ke sar aajiz ka un ne aur bhi pagDi pher rakhi

faKHr ki kaun si jagah thi yan aisa kya rustam mara

jis mizmar mein rustam ki bhi rah na nikli 'mir' kabhu

us maidan ki KHak pe hum ne jurat kar ke qadam mara