kam-fursati-e-gul jo kahen koi na mane

kam-fursatī-e-gul jo kaheñ koī na maane

aise ga.e ayyām-e-bahārāñ ki na jaane

the shahr meñ ai rashk-e-parī jitne siyāne

sab ho ga.e haiñ shor tirā sun ke divāne

ham-rāh javānī ga.e hangāme uThāne

ab ham bhī nahīñ ve rahe nai ve haiñ zamāne

piirī meñ jo baaqī nahīñ jaame meñ to kyā duur

phaTne lage haiñ kapḌe jo hote haiñ purāne

marte hī sune ham ne kasal-mand-e-mohabbat

is dard meñ kis kis ko kiyā naf.a davā ne

hai kis ko mayassar tirī zulfoñ kī asīrī

shāne ke nasīboñ meñ the yuuñ haath bañdhāne

Tuk aañkh bhī kholī na za-ḳhud-rafta ne us ke

har-chand kiyā shor qayāmat ne sirhāne

lohe ke tave haiñ jigar-e-ahl-e-mohabbat

rahte haiñ tire tīr-e-sitam hī ke nishāne

kaahe ko ye andāz thā e'rāz-e-butāñ kā

zāhir hai ki muñh pher liyā ham se ḳhudā ne

in hī chamanoñ meñ ki jinhoñ meñ nahīñ ab chhāñv

kin kin ravishoñ ham ko phirāyā hai havā ne

kab kab mirī izzat ke liye baiThe ho Tuk paas

aa.e bhī jo ho to mujhe majlis se uThāne

paayā hai na ham ne dil-e-gum-gashta ko apne

ḳhaak us kī sar-e-rāh kī koī kab ta.iiñ chhāne

kuchh tum ko hamāre jigaroñ par bhī nazar hai

aate jo ho har shām-o-sahar tiir lagāne

majrūh badan sang se tiflāñ ke na hote

kam jaate jo us kūche meñ par ham the divāne

aane meñ ta'allul hī kiyā āqibat-e-kār

ham jī se ga.e par na ga.e us ke bahāne

galiyoñ meñ bahut ham to pareshāñ se phire haiñ

aubāsh kisū roz lagā deñge Thikāne

kam-fursati-e-gul jo kahen koi na mane

aise gae ayyam-e-bahaaran ki na jaane

the shahr mein ai rashk-e-pari jitne siyane

sab ho gae hain shor tera sun ke diwane

ham-rah jawani gae hangame uThane

ab hum bhi nahin we rahe nai we hain zamane

piri mein jo baqi nahin jame mein to kya dur

phaTne lage hain kapDe jo hote hain purane

marte hi sune hum ne kasal-mand-e-mohabbat

is dard mein kis kis ko kiya nafa dawa ne

hai kis ko mayassar teri zulfon ki asiri

shane ke nasibon mein the yun hath bandhane

Tuk aankh bhi kholi na za-KHud-rafta ne us ke

har-chand kiya shor qayamat ne sirhane

lohe ke tawe hain jigar-e-ahl-e-mohabbat

rahte hain tere tir-e-sitam hi ke nishane

kahe ko ye andaz tha e'raaz-e-butan ka

zahir hai ki munh pher liya hum se KHuda ne

in hi chamanon mein ki jinhon mein nahin ab chhanw

kin kin rawishon hum ko phiraya hai hawa ne

kab kab meri izzat ke liye baiThe ho Tuk pas

aae bhi jo ho to mujhe majlis se uThane

paya hai na hum ne dil-e-gum-gashta ko apne

KHak us ki sar-e-rah ki koi kab tain chhane

kuchh tum ko hamare jigaron par bhi nazar hai

aate jo ho har sham-o-sahar tir lagane

majruh badan sang se tiflan ke na hote

kam jate jo us kuche mein par hum the diwane

aane mein ta'allul hi kiya aaqibat-e-kar

hum ji se gae par na gae us ke bahane

galiyon mein bahut hum to pareshan se phire hain

aubash kisu roz laga denge Thikane