koi nahin jahan mein jo andohgin nahin

koī nahīñ jahāñ meñ jo andohgīñ nahīñ

is ġham-kade meñ aah dil-e-ḳhush kahīñ nahīñ

kartā hai abr da.avā-e-dariyā-dilī abas

dāman nahīñ mirā tū mirī āstīñ nahīñ

aage tū la.al-e-nau ḳhat-e-ḳhūbāñ ke dam na maar

har chand ai masīh ve bāteñ rahīñ nahīñ

ye dard us ke kyūñke karūñ dil-nashīñ ki aah

kahtā huuñ jis tarah se kahe hai nahīñ nahīñ

māthā kiyā hai sarf-e-sujūd-e-dar-e-butāñ

mānind māh-e-nau ke mirī ab jabīñ nahīñ

kahtā huuñ hāl-e-dil to kahe hai ki mat bake

kyoñ na.iiñ tirī to baat mire dil-nashīñ nahīñ

ghar ghar hai mulk-e-ishq meñ dozaḳh kī tāb-o-tab

bhaḌkā na ham ko shaiḳh ye ātish yuhīñ nahīñ

zaa.e.a kiyā maiñ apne ta.iiñ tū ne kī ḳhushī

be-mehr kyūñke jāniye tujh meñ ki kiiñ nahīñ

fikr-e-buland se maiñ kiyā āsmāñ use

har-yak se 'mīr' ḳhuub ho ye vo zamīñ nahīñ

koi nahin jahan mein jo andohgin nahin

is gham-kade mein aah dil-e-KHush kahin nahin

karta hai abr dawa-e-dariya-dili abas

daman nahin mera tu meri aastin nahin

aage tu lal-e-nau KHat-e-KHuban ke dam na mar

har chand ai masih we baaten rahin nahin

ye dard us ke kyunke karun dil-nashin ki aah

kahta hun jis tarah se kahe hai nahin nahin

matha kiya hai sarf-e-sujud-e-dar-e-butan

manind mah-e-nau ke meri ab jabin nahin

kahta hun haal-e-dil to kahe hai ki mat bake

kyon nain teri to baat mere dil-nashin nahin

ghar ghar hai mulk-e-ishq mein dozaKH ki tab-o-tab

bhaDka na hum ko shaiKH ye aatish yuhin nahin

zaea kiya main apne tain tu ne ki KHushi

be-mehr kyunke jaaniye tujh mein ki kin nahin

fikr-e-buland se main kiya aasman use

har-yak se 'mir' KHub ho ye wo zamin nahin