kyunkar mujhko nama-namat har harf pe pech-o-tab na ho

kyūñkar mujh ko nāma-namat har harf pe pech-o-tāb na ho

sau sau qāsid jaan se jāveñ yak ko udhar se javāb na ho

gul ko dekh ke gulshan ke darvāze hī se phir aayā

kyā mil baiThiye us se bhalā jo sohbat hī kā baab na ho

mastī ḳharābī sar par laa.ī kā'be se uTh dair gayā

jis ko ḳhudā ne ḳharāb kiyā ho phir vo kyūñke ḳharāb na ho

ḳhal'-e-badan karne se 'āshiq ḳhush rahte haiñ is ḳhātir

jān-o-jānāñ ek haiñ yā'nī biich meñ tan jo hisāb na ho

ḳhashm-o-ḳhitāb jabīñ par chiiñ to husn hai gul-ruḳhsāroñ kā

vo mahbūb ḳhunuk hotā hai jis meñ nāz-o-‘itāb na ho

maiñ ne jo kuchh kahā kiyā hai hadd-o-hisāb se afzūñ hai

roz-e-shumār meñ yārab mere kahe kiye kā hisāb na ho

sabr balā-hā-e-'ishqī par hausle vaale karte haiñ

rahmat hai us ḳhasta jigar ko dil jis kā betāb na ho

jis shab gul dekhā hai ham ne sub.h ko us kā muñh dekhā

ḳhvāb hamārā havā huā hai logoñ kā sā ḳhvāb na ho

nahreñ chaman kī bhar rakkhī haiñ goyā bāda-e-lā’liñ se

be-aks-e-gul-o-lāla ilāhī in jūyoñ meñ aab na ho

us din maiñ to mastāna hotā huuñ koī kūcha-gada

jis din kāsa-e-chobīñ meñ mere yak jur'a bhī sharāb na ho

tah-dārī kuchh dīda-e-tar kī 'mīr' nahīñ kam dariyā se

joshāñ shor-kunāñ aa jaave ye sho'la sailāb na ho

kyunkar mujh ko nama-namat har harf pe pech-o-tab na ho

sau sau qasid jaan se jawen yak ko udhar se jawab na ho

gul ko dekh ke gulshan ke darwaze hi se phir aaya

kya mil baiThiye us se bhala jo sohbat hi ka bab na ho

masti KHarabi sar par lai ka'be se uTh dair gaya

jis ko KHuda ne KHarab kiya ho phir wo kyunke KHarab na ho

KHal'-e-badan karne se 'ashiq KHush rahte hain is KHatir

jaan-o-jaanan ek hain ya'ni bich mein tan jo hisab na ho

KHashm-o-KHitab jabin par chin to husn hai gul-ruKHsaron ka

wo mahbub KHunuk hota hai jis mein naz-o-‘itab na ho

main ne jo kuchh kaha kiya hai hadd-o-hisab se afzun hai

roz-e-shumar mein yarab mere kahe kiye ka hisab na ho

sabr bala-ha-e-'ishqi par hausle wale karte hain

rahmat hai us KHasta jigar ko dil jis ka betab na ho

jis shab gul dekha hai hum ne subh ko us ka munh dekha

KHwab hamara hawa hua hai logon ka sa KHwab na ho

nahren chaman ki bhar rakkhi hain goya baada-e-la’lin se

be-aks-e-gul-o-lala ilahi in juyon mein aab na ho

us din main to mastana hota hun koi kucha-gada

jis din kasa-e-chobin mein mere yak jur'a bhi sharab na ho

tah-dari kuchh dida-e-tar ki 'mir' nahin kam dariya se

joshan shor-kunan aa jawe ye sho'la sailab na ho