mata-e-dil is ishq ne sab jala di

matā-e-dil is 'ishq ne sab jalā dī

koī din hī meñ ḳhaak sī yaañ uḌā dī

dalīl is bayābāñ meñ dil hī hai apnā

na ḳhizr-o-balad yaañ na rahbar na haadī

mizājoñ meñ yaas aa ga.ī hai hamāre

na marne kā ġham hai na jiine kī shādī

na pūchho ki chhātī ke jalne ne āḳhir

'ajab aag dil meñ jigar meñ lagā dī

vafā log aapas meñ karte the aage

ye rasm-e-kuhan aah tum ne uThā dī

judā un ġhazālān-e-shahrī se ho kar

phire ham bagūle se vādī-ba-vādī

sabā us taraf ko chalī jal ga.e ham

huā ye sabab apne marne kā baadī

vo nusḳha jo dekhā baḌhā rog dil kā

tabīb-e-mohabbat ne kaisī davā dī

mile qasr jannat meñ pīr-e-muġhāñ ko

hameñ zer-e-dīvār-e-mai-ḳhāna jā dī

na ho 'ishq kā shor tā 'mīr' hargiz

chale bas to shahroñ meñ kariye munādī

mata-e-dil is 'ishq ne sab jala di

koi din hi mein KHak si yan uDa di

dalil is bayaban mein dil hi hai apna

na KHizr-o-balad yan na rahbar na hadi

mizajon mein yas aa gai hai hamare

na marne ka gham hai na jine ki shadi

na puchho ki chhati ke jalne ne aaKHir

'ajab aag dil mein jigar mein laga di

wafa log aapas mein karte the aage

ye rasm-e-kuhan aah tum ne uTha di

juda un ghazalan-e-shahri se ho kar

phire hum bagule se wadi-ba-wadi

saba us taraf ko chali jal gae hum

hua ye sabab apne marne ka baadi

wo nusKHa jo dekha baDha rog dil ka

tabib-e-mohabbat ne kaisi dawa di

mile qasr jannat mein pir-e-mughan ko

hamein zer-e-diwar-e-mai-KHana ja di

na ho 'ishq ka shor ta 'mir' hargiz

chale bas to shahron mein kariye munadi