muddat se to dilon ki mulaqat bhi gai

muddat se to diloñ kī mulāqāt bhī ga.ī

zāhir kā paas thā so mudārāt bhī ga.ī

kitne dinoñ meñ aa.ī thī us kī shab-e-visāl

bāham rahī laḌā.ī so vo raat bhī ga.ī

kuchh kahte aa ke ham to sunā karte ve ḳhamosh

ab har suḳhan pe bahs hai vo baat bhī ga.ī

niklī jo thī to bint-e-inab āsima hī thī

ab to ḳharāb ho ke ḳharābāt bhī ga.ī

ammāma jā-namāz ga.e le ke muġhbache

vaa.iz kī ab libāsī karāmāt bhī ga.ī

phirte haiñ 'mīr' ḳhaar koī pūchhtā nahīñ

is āshiqī meñ izzat-e-sādāt bhī ga.ī

muddat se to dilon ki mulaqat bhi gai

zahir ka pas tha so mudaraat bhi gai

kitne dinon mein aai thi us ki shab-e-visal

baham rahi laDai so wo raat bhi gai

kuchh kahte aa ke hum to suna karte we KHamosh

ab har suKHan pe bahs hai wo baat bhi gai

nikli jo thi to bint-e-inab aasima hi thi

ab to KHarab ho ke KHarabaat bhi gai

ammama ja-namaz gae le ke mughbache

waiz ki ab libasi karamat bhi gai

phirte hain 'mir' KHar koi puchhta nahin

is aashiqi mein izzat-e-sadat bhi gai