na jurat hai na jazba hai na yari baKHt-e-bad se hai

na jur.at hai na jazba hai na yaarī baḳht-e-bad se hai

yahī be-tāqatī ḳhūñ-gashta dil ko mere kad se hai

jahāñ shatranj-bāzinda falak ham tum haiñ sab mohre

basān-e-shātir-e-nau zauq use mohroñ kī zad se hai

suḳhan karne meñ nastā’līq-goī hī nahīñ kartā

paḌheñ haiñ she'r koī ham so vo bhī shadd-o-mad se hai

huā sarsabz aage yaar ke sarv-e-gulistāñ kab

ki nisbat duur kī tuubā ko us ke naḳhl-e-qad se hai

likhā kab tak kareñ is sarzamīñ se aaphī ab jāveñ

hameñ milne kā shauq us ke ziyād ai 'mīr' had se hai

na jurat hai na jazba hai na yari baKHt-e-bad se hai

yahi be-taqati KHun-gashta dil ko mere kad se hai

jahan shatranj-bazinda falak hum tum hain sab mohre

basan-e-shatir-e-nau zauq use mohron ki zad se hai

suKHan karne mein nasta’liq-goi hi nahin karta

paDhen hain she'r koi hum so wo bhi shadd-o-mad se hai

hua sarsabz aage yar ke sarw-e-gulistan kab

ki nisbat dur ki tuba ko us ke naKHl-e-qad se hai

likha kab tak karen is sarzamin se aaphi ab jawen

hamein milne ka shauq us ke ziyaad ai 'mir' had se hai