naKHun se bul-hawas ka gala yunhi chhil gaya

nāḳhun se bul-havas kā galā yūñhī chhil gayā

lohū lagā ke vo bhī shahīdoñ meñ mil gayā

dil jam.a thā jo ġhuncha ke rañgoñ ḳhizāñ meñ thā

ai kyā kahūñ bahār gul-e-zaḳhm khil gayā

be-dil hue pe karte tadāruk jo rahtā hosh

ham aap hī meñ aa.e nahīñ jab se dil gayā

dekhā nahīñ pahāḌ-e-girāñ-sang yā subuk

zoroñ chaḌhā thā ishq meñ farhād pil gayā

shabnam kī sī numūd se thā maiñ araq araq

ya.anī ki hastī nang-e-adam thī ḳhajil gayā

ġham khīñchte hilā nahīñ jāgah se kyā karūñ

dil jā lage hai dam-ba-dam ūdhar hī hil gayā

sūrat na dekhī vaisī kushāda-jabīñ kahīñ

maiñ 'mīr' is talāsh meñ chīn-o-chigil gayā

naKHun se bul-hawas ka gala yunhi chhil gaya

lohu laga ke wo bhi shahidon mein mil gaya

dil jama tha jo ghuncha ke rangon KHizan mein tha

ai kya kahun bahaar gul-e-zaKHm khil gaya

be-dil hue pe karte tadaruk jo rahta hosh

hum aap hi mein aae nahin jab se dil gaya

dekha nahin pahaD-e-giran-sang ya subuk

zoron chaDha tha ishq mein farhad pil gaya

shabnam ki si numud se tha main araq araq

yani ki hasti nang-e-adam thi KHajil gaya

gham khinchte hila nahin jagah se kya karun

dil ja lage hai dam-ba-dam udhar hi hil gaya

surat na dekhi waisi kushada-jabin kahin

main 'mir' is talash mein chin-o-chigil gaya