paDa tha shor jaisa har taraf us la-ubaali ka

paḌā thā shor jaisā har taraf us lā-ubālī kā

rahā vaisā hī hangāma mirī bhī zār-nālī kā

rahe bad-hāl suufī haal karte der majlis meñ

muġhannī se sunā misrā jo mere sher-e-hālī kā

nazar bhar dekhtā koī to tum āñkheñ chhupā lete

samāñ ab yaad hogā kab tumheñ vo ḳhurd-sālī kā

chamak yāqūt kī chaltī hai itnī duur kaahe ko

achambhā hai nazar-bāzoñ ko un hoñToñ kī laalī kā

phire bastī meñ rūyat kuchh nahīñ iflās se apnī

ilāhī hove muñh kaalā shitāb is dast-e-ḳhālī kā

dimāġh apnā to apnī fikr hī meñ ho chukā yaksar

ḳhayāl ab kis ko hai ai ham-nashīñ nāzuk-ḳhayālī kā

zalīl-o-ḳhvār haiñ ham aage ḳhūbāñ ke hamesha se

parekhā kuchh nahīñ hai ham ko in kī jhiḌkī gaalī kā

Daro chauñko jo chaspāñ iḳhtilātī tum se ho mujh ko

tashattut kyā hai merī duur kī is dekhā-bhālī kā

na pahuñchī jo duā-e-'mīr' vaañ tak to ajab kyā hai

'ulū-e-martaba hai bas-ki us dargāh-e-ālī kā

paDa tha shor jaisa har taraf us la-ubaali ka

raha waisa hi hangama meri bhi zar-nali ka

rahe bad-haal sufi haal karte der majlis mein

mughanni se suna misra jo mere sher-e-haali ka

nazar bhar dekhta koi to tum aankhen chhupa lete

saman ab yaad hoga kab tumhein wo KHurd-sali ka

chamak yaqut ki chalti hai itni dur kahe ko

achambha hai nazar-bazon ko un honTon ki lali ka

phire basti mein ruyat kuchh nahin iflas se apni

ilahi howe munh kala shitab is dast-e-KHali ka

dimagh apna to apni fikr hi mein ho chuka yaksar

KHayal ab kis ko hai ai ham-nashin nazuk-KHayali ka

zalil-o-KHwar hain hum aage KHuban ke hamesha se

parekha kuchh nahin hai hum ko in ki jhiDki gali ka

Daro chaunko jo chaspan iKHtilati tum se ho mujh ko

tashattut kya hai meri dur ki is dekha-bhaali ka

na pahunchi jo dua-e-'mir' wan tak to ajab kya hai

'ulu-e-martaba hai bas-ki us dargah-e-ali ka