phirta hai zindagi ke liye aah KHwar kya

phirtā hai zindagī ke liye aah ḳhvār kyā

us vahm kī numūd kā hai e.atibār kyā

kyā jāneñ ham asīr-e-qafas-zād ai nasīm

gul kaise baaġh kahte haiñ kis ko bahār kyā

āñkheñ ba-rang-e-naqsh-e-qadam ho ga.iiñ safed

phir aur koī is kā kare intizār kyā

sīkhī hai tarah sīna-figārī kī sab mirī

laa.e the saath chāk-e-dil aisā anaar kyā

sarkash kisū se aisī kudūrat rakhe vo shoḳh

ham us kī ḳhāk-e-rāh haiñ ham se ġhubār kyā

ne vo nigah chubhī hai na ve palkeñ gaḌ ga.iiñ

kyā jāniye ki dil ko hai ye ḳhaar ḳhaar kyā

letā hai abr ab ta.iiñ is nāhiye se aab

ro.e haiñ ham bhī barsoñ ta.iiñ zaar zaar kyā

āshiq ke dil se rakh na tasallī ki chashm-dāsht

hai barq paara ye ise aave qarār kyā

sohbat rahī bigaḌtī hī us kīna-var se aah

ham jānte nahīñ haiñ ki hotā hai pyaar kyā

maarā ho ek do ko to ho mudda.ī koī

kushtoñ kā us ke roz-e-jazā meñ shumār kyā

muddat se jarga jarga sar-e-tīr hiiñ ġhazāl

kam ho gayā hai yāroñ kā zauq-e-shikār kyā

paate haiñ apne haal meñ majbūr sab ko ham

kahne ko iḳhtiyār hai par iḳhtiyār kyā

āḳhir zamāna-sāzī se khoyā na vaqr-e-mīr

ye iḳhtiyār tum ne kiyā rozgār kyā

phirta hai zindagi ke liye aah KHwar kya

us wahm ki numud ka hai eatibar kya

kya jaanen hum asir-e-qafas-zad ai nasim

gul kaise bagh kahte hain kis ko bahaar kya

aankhen ba-rang-e-naqsh-e-qadam ho gain safed

phir aur koi is ka kare intizar kya

sikhi hai tarah sina-figari ki sab meri

lae the sath chaak-e-dil aisa anar kya

sarkash kisu se aisi kudurat rakhe wo shoKH

hum us ki KHak-e-rah hain hum se ghubar kya

ne wo nigah chubhi hai na we palken gaD gain

kya jaaniye ki dil ko hai ye KHar KHar kya

leta hai abr ab tain is nahiye se aab

roe hain hum bhi barson tain zar zar kya

aashiq ke dil se rakh na tasalli ki chashm-dasht

hai barq para ye ise aawe qarar kya

sohbat rahi bigaDti hi us kina-war se aah

hum jaante nahin hain ki hota hai pyar kya

mara ho ek do ko to ho muddai koi

kushton ka us ke roz-e-jaza mein shumar kya

muddat se jarga jarga sar-e-tir hin ghazal

kam ho gaya hai yaron ka zauq-e-shikar kya

pate hain apne haal mein majbur sab ko hum

kahne ko iKHtiyar hai par iKHtiyar kya

aaKHir zamana-sazi se khoya na waqr-e-mir

ye iKHtiyar tum ne kiya rozgar kya