tark-e-libas se mere use kya wo rafta ranai ka

tark-e-libās se mere use kyā vo rafta ra.anā.ī kā

jaame kā dāman paañv meñ uljhā haath āñchal iklā.ī kā

paas se uTh chaltā hai vo to aap meñ maiñ rahtā hī nahīñ

le jaatā hai jā se mujh ko jaanā us harjā.ī kā

haal na merā dekhe hai na kahe se ta.ammul hai us ko

mahv hai ḳhud-ārā.ī kā yā be-ḳhud hai ḳhud-rā.ī kā

zāhir meñ ḳhurshīd huā vo nuur meñ apne pinhāñ hai

ḳhālī nahīñ hai husn se chhupnā aise bhī paidā.ī kā

yaad meñ us kī qāmat kī maiñ lohū ro ro suukh gayā

āḳhir ye ḳhamyāza khīñchā us ḳharch-e-bālā.ī kā

bād-e-marg charāġh na laave gor pe vo āshiq kī aah

jiite jī bhī daaġh hī thā maiñ us kī be-parvā.ī kā

chashm-e-vafā iḳhvān-e-zamāñ se saada ho so rakkhe 'mīr'

qissa hai mash.hūr-e-zamāna pahle donoñ bhaa.ī kā

tark-e-libas se mere use kya wo rafta ranai ka

jame ka daman panw mein uljha hath aanchal iklai ka

pas se uTh chalta hai wo to aap mein main rahta hi nahin

le jata hai ja se mujh ko jaana us harjai ka

haal na mera dekhe hai na kahe se tammul hai us ko

mahw hai KHud-arai ka ya be-KHud hai KHud-rai ka

zahir mein KHurshid hua wo nur mein apne pinhan hai

KHali nahin hai husn se chhupna aise bhi paidai ka

yaad mein us ki qamat ki main lohu ro ro sukh gaya

aaKHir ye KHamyaza khincha us KHarch-e-baalai ka

baad-e-marg charagh na lawe gor pe wo aashiq ki aah

jite ji bhi dagh hi tha main us ki be-parwai ka

chashm-e-wafa iKHwan-e-zaman se sada ho so rakkhe 'mir'

qissa hai mashhur-e-zamana pahle donon bhai ka