aamal ke sae to Darane mein lage hain

ā'māl ke saa.e to Darāne meñ lage haiñ

sarkār magar mujh ko bachāne meñ lage haiñ

hai rahmat-e-kaunain kī kaunain meñ aamad

'ushshāq dar-o-bām sajāne meñ lage haiñ

kasrat se jo paḌhte haiñ darūd-e-shah-e-bat.hā

vo log muqaddar ko jagāne meñ lage haiñ

hāthoñ meñ liye kausar-o-tasnīm ke sāġhar

vo tishna-labī sab kī bujhāne meñ lage haiñ

sarkār ke aane kī ḳhabar jab se milī hai

but kā'be ke muñh apnā chhupāne meñ lage haiñ

duniyā to amīroñ kī taraf dekh rahī hai

vo naaz ġharīboñ ke uThāne meñ lage haiñ

hai pesh-e-nazar rauza-e-āqā jo 'shamīm' aaj

jazbāt mire ashk bahāne meñ lage haiñ

aa'mal ke sae to Darane mein lage hain

sarkar magar mujh ko bachane mein lage hain

hai rahmat-e-kaunain ki kaunain mein aamad

'ushshaq dar-o-baam sajaane mein lage hain

kasrat se jo paDhte hain darud-e-shah-e-batha

wo log muqaddar ko jagane mein lage hain

hathon mein liye kausar-o-tasnim ke saghar

wo tishna-labi sab ki bujhane mein lage hain

sarkar ke aane ki KHabar jab se mili hai

but ka'be ke munh apna chhupane mein lage hain

duniya to amiron ki taraf dekh rahi hai

wo naz gharibon ke uThane mein lage hain

hai pesh-e-nazar rauza-e-aqa jo 'shamim' aaj

jazbaat mere ashk bahane mein lage hain