hum apne kandhon pe bar-e-garan uThate hain

ham apne kāñdhoñ pe bār-e-garāñ uThāte haiñ

zamīñ pe rahte haiñ aur āsmāñ uThāte haiñ

ishāre naa't ke īmān vaalā samjhegā

zabāñ kā lutf kahīñ be-zabāñ uThāte haiñ

kahāñ chalī ga.ī bāzār-e-misr kī garmī

ye kaun aayā ki aazar dukāñ uThāte haiñ

ham apnī zaat kā ġham bhī uThā nahīñ paate

magar vo haiñ ki ġham-e-do-jahāñ uThāte haiñ

bhulā.e baiThe haiñ maġhrib kī bārishoñ kā 'azāb

aqīdatoñ kā jo be-chhat makāñ uThāte haiñ

jhamakne lagtā hai vo āstāñ nigāhoñ meñ

savāl sajdoñ kā jab āstāñ uThāte haiñ

nabī ke 'ishq kā sarmāya jin ke paas nahīñ

sunā lahad meñ baḌī saḳhtiyāñ uThāte the

'ajab nahīñ vo sar-e-hashr sarfarāz kare

hamārā naaz shah-e-ins-o-jāñ uThāte haiñ

'ra.īs' hī sahī lekin faqīr-e-taiba huuñ

vo jānte nahīñ jo uñgliyāñ uThāte haiñ

hum apne kandhon pe bar-e-garan uThate hain

zamin pe rahte hain aur aasman uThate hain

ishaare na't ke iman wala samjhega

zaban ka lutf kahin be-zaban uThate hain

kahan chali gai bazar-e-misr ki garmi

ye kaun aaya ki aazar dukan uThate hain

hum apni zat ka gham bhi uTha nahin pate

magar wo hain ki gham-e-do-jahan uThate hain

bhulae baiThe hain maghrib ki barishon ka 'azab

aqidaton ka jo be-chhat makan uThate hain

jhamakne lagta hai wo aastan nigahon mein

sawal sajdon ka jab aastan uThate hain

nabi ke 'ishq ka sarmaya jin ke pas nahin

suna lahad mein baDi saKHtiyan uThate the

'ajab nahin wo sar-e-hashr sarfaraaz kare

hamara naz shah-e-ins-o-jaan uThate hain

'rais' hi sahi lekin faqir-e-taiba hun

wo jaante nahin jo ungliyan uThate hain