hina se hai ye teri surKH ai nigar angusht

hinā se hai ye tirī surḳh ai nigār angusht

ki ho na panjā-e-marjāñ kī zīnhār angusht

hilāl-o-badr hoñ yakjā araq-fishānī ko

rakhe jabīñ pe jo tū kar ke tābdār angusht

bayāñ zarūr hai ab dast-e-teġh kā us ke

nikal ga.ī sipar-e-mah se jis kī paar angusht

mohammad-e-arabī mo.ajizoñ kā jis ke kabhī

na kar sake falak-e-pīr kā shumār angusht

chaman meñ us kī risālat kā jab kuchh aa.e hai zikr

alam kare hai shahādat kī shāḳh-sār angusht

vazīfa jis kā paḌhe hai ye dāna-e-shabnam

duā meñ jis kī hai khole hue chīnār angusht

agar ho mohra-e-gahvāra sang-e-farsh us kā

na chūse apnī kabhī tifl-e-shīr-ḳhvār angusht

uThā de gar kaf-e-afsos malne kī vo rasm

na hove phir kabhī angusht se do-chār angusht

hina se hai ye teri surKH ai nigar angusht

ki ho na panja-e-marjaan ki zinhaar angusht

hilal-o-badr hon yakja araq-fishani ko

rakhe jabin pe jo tu kar ke tabdar angusht

bayan zarur hai ab dast-e-tegh ka us ke

nikal gai sipar-e-mah se jis ki par angusht

mohammad-e-arabi moajizon ka jis ke kabhi

na kar sake falak-e-pir ka shumar angusht

chaman mein us ki risalat ka jab kuchh aae hai zikr

alam kare hai shahadat ki shaKH-sar angusht

wazifa jis ka paDhe hai ye dana-e-shabnam

dua mein jis ki hai khole hue chinar angusht

agar ho mohra-e-gahwara sang-e-farsh us ka

na chuse apni kabhi tifl-e-shir-KHwar angusht

uTha de gar kaf-e-afsos malne ki wo rasm

na howe phir kabhi angusht se do-chaar angusht