ho chahe jis libas mein shaida rasul ka

ho chāhe jis libās meñ shaidā rasūl kā

chhuptā nahīñ hai chāhne vaalā rasūl kā

āyāt-e-haq haiñ saarī havāla rasūl kā

ye jāntā hai jānñe vaalā rasūl kā

me'rāj-e-ambiyā hai ziyārat rasūl kī

tanvīr-e-kibriyā hai sarāpā rasūl kā

us ko matā'-e-'ishrat-e-kaunain mil ga.ī

mil jaa.e jis ko naqsh-e-kaf-e-pā rasūl kā

maiñ bhī huuñ un kī diid kā armāñ liye hue

hotā hai jin ko dekh ke dhokā rasūl kā

jhulsā sakegī ham ko zamāne kī dhuup kyā

paiham hamāre sar pe hai saaya rasūl kā

vo 'ilm kī zamīñ ho ki 'irfāñ kā āsmāñ

donoñ ke ruḳh pe nuur hai phailā rasūl kā

'vasfī' rahegā yūñhī ravāñ roz-e-hashr tak

ruktā hai kis ke roke se dhārā rasūl kā

ho chahe jis libas mein shaida rasul ka

chhupta nahin hai chahne wala rasul ka

aayat-e-haq hain sari hawala rasul ka

ye jaanta hai jaanne wala rasul ka

me'raj-e-ambiya hai ziyarat rasul ki

tanwir-e-kibriya hai sarapa rasul ka

us ko mata'-e-'ishrat-e-kaunain mil gai

mil jae jis ko naqsh-e-kaf-e-pa rasul ka

main bhi hun un ki did ka arman liye hue

hota hai jin ko dekh ke dhoka rasul ka

jhulsa sakegi hum ko zamane ki dhup kya

paiham hamare sar pe hai saya rasul ka

wo 'ilm ki zamin ho ki 'irfan ka aasman

donon ke ruKH pe nur hai phaila rasul ka

'wasfi' rahega yunhi rawan roz-e-hashr tak

rukta hai kis ke roke se dhaara rasul ka