jidhar hans ke shah-e-umam dekhte hain

jidhar hañs ke shāh-e-umam dekhte haiñ

udhar rahmat-e-‘ām ham dekhte haiñ

habīb-e-ḳhudā kī navāzish ke sadqe

unheñ ḳhvāb meñ roz ham dekhte haiñ

unhīñ kī tamanna unhīñ kā tasavvur

unhīñ kī taraf dam-ba-dam dekhte haiñ

vo tā'līm-e-sabr-o-razā dī hai ham ko

na dukh dekhte haiñ na ġham dekhte haiñ

masīhā hai husn-e-tabassum nabī kā

ki ab dard-e-dil kam se kam dekhte haiñ

darūd un pe bhejeñ to rad hoñ balā.eñ

jo duniyā ke ranj-o-alam dekhte haiñ

baḌe karb meñ haiñ hasad karne vaale

ki rag-rag meñ ab nīsh-e-ġham dekhte haiñ

ġham-e-do-jahāñ 'ishq-e-ahmad meñ kyā hai

use naqsh-bar-āb ham dekhte haiñ

jo me'rāj meñ tum ne dekhe haiñ jalve

vo me'rāj kī raat ham dekhte haiñ

jinheñ daulat-e-chashm-e-bātin milī hai

vo sair-e-vujūd-o-'adam dekhte haiñ

mujāhid utarte haiñ jis mā'rke meñ

vo fat.h-o-zafar dam-ba-dam dekhte haiñ

na dār-o-rasan haiñ na dār-ul-mehan hai

yahāñ sab ko āzād ham dekhte haiñ

diye dars vo ‘ilm-o-hikmat ke tum ne

is ummat ko ḳhair-ul-umam dekhte haiñ

sahāba kī rif'at bayāñ kyā ho 'mahvī'

ki qadmoñ meñ ham tāj-e-jam dekhte haiñ

jidhar hans ke shah-e-umam dekhte hain

udhar rahmat-e-‘am hum dekhte hain

habib-e-KHuda ki nawazish ke sadqe

unhen KHwab mein roz hum dekhte hain

unhin ki tamanna unhin ka tasawwur

unhin ki taraf dam-ba-dam dekhte hain

wo ta'lim-e-sabr-o-raza di hai hum ko

na dukh dekhte hain na gham dekhte hain

masiha hai husn-e-tabassum nabi ka

ki ab dard-e-dil kam se kam dekhte hain

darud un pe bhejen to rad hon balaen

jo duniya ke ranj-o-alam dekhte hain

baDe karb mein hain hasad karne wale

ki rag-rag mein ab nish-e-gham dekhte hain

gham-e-do-jahan 'ishq-e-ahmad mein kya hai

use naqsh-bar-ab hum dekhte hain

jo me'raj mein tum ne dekhe hain jalwe

wo me'raj ki raat hum dekhte hain

jinhen daulat-e-chashm-e-baatin mili hai

wo sair-e-wujud-o-'adam dekhte hain

mujahid utarte hain jis ma'rke mein

wo fath-o-zafar dam-ba-dam dekhte hain

na dar-o-rasan hain na dar-ul-mehan hai

yahan sab ko aazad hum dekhte hain

diye dars wo ‘ilm-o-hikmat ke tum ne

is ummat ko KHair-ul-umam dekhte hain

sahaba ki rif'at bayan kya ho 'mahwi'

ki qadmon mein hum taj-e-jam dekhte hain