jis mein tera aks utar gaya hai

jis meñ tirā aks utar gayā hai

ā.īna vahī sañvar gayā hai

jo naam pe tere mar gayā hai

duniyā meñ vo naam kar gayā hai

begāna rahā jo tere dar se

kam-baḳht vo dar-ba-dar gayā hai

jis ko bhī milā tirā safīna

ḳhush-baḳht vo yaar utar gayā hai

ā.īna-e-mustafā meñ aa kar

kyā jalva-e-haq nikhar gayā hai

bātil ko miTā ke haq kā parcham

tā-arsh buland kar gayā hai

haq tujh pe nisār aur haq par

sab kuchh tū nisār kar gayā hai

vo nuur ki thā hirā kī zīnat

kaunain pe ab bikhar gayā hai

firdaus-ba-kaf huiiñ vo rāheñ

jin rāhoñ se tū guzar gayā hai

kamyāb bahut thā nūr-e-yazdāñ

is nuur ko aam kar gayā hai

chaḌhtā huā ahraman kā dariyā

aate hī tire utar gayā hai

jibrīl kī sidra tak rasā.ī

tū duur se dūr-tar gayā hai

mast-e-mai-e-haq rah-e-fanā se

be-ḳhauf-o-ḳhatar guzar gayā hai

'sahbā.ī'-e-be-navā ke dil meñ

tū apnā hī nuur bhar gayā hai

jis mein tera aks utar gaya hai

aaina wahi sanwar gaya hai

jo nam pe tere mar gaya hai

duniya mein wo nam kar gaya hai

begana raha jo tere dar se

kam-baKHt wo dar-ba-dar gaya hai

jis ko bhi mila tera safina

KHush-baKHt wo yar utar gaya hai

aaina-e-mustafa mein aa kar

kya jalwa-e-haq nikhar gaya hai

baatil ko miTa ke haq ka parcham

ta-arsh buland kar gaya hai

haq tujh pe nisar aur haq par

sab kuchh tu nisar kar gaya hai

wo nur ki tha hira ki zinat

kaunain pe ab bikhar gaya hai

firdaus-ba-kaf huin wo rahen

jin rahon se tu guzar gaya hai

kamyab bahut tha nur-e-yazdan

is nur ko aam kar gaya hai

chaDhta hua ahraman ka dariya

aate hi tere utar gaya hai

jibril ki sidra tak rasai

tu dur se dur-tar gaya hai

mast-e-mai-e-haq rah-e-fana se

be-KHauf-o-KHatar guzar gaya hai

'sahbai'-e-be-nawa ke dil mein

tu apna hi nur bhar gaya hai