jitne Tapke aankh se ashk-e-nadamat dekhna

jitne Tapke aañkh se ashk-e-nadāmat dekhnā

ban ga.e sab mash'al-e-nūr-e-hidāyat dekhnā

jazb-e-ulfat dekhnā shān-e-'aqīdat dekhnā

ho ga.ī bā-vasf-e-dūrī un se qurbat dekhnā

dil kī har hasrat had-e-lafz-o-bayāñ meñ aa ga.ī

kitnī mā'nī-ḳhez hai ik un kī hasrat dekhnā

un kā naam aate hī lab par aañkh pur-nam ho ga.ī

mere jazbāt-e-‘aqīdat kī nazākat dekhnā

vo shah-e-kaunain aur maiñ ik gadā-e-be-navā

phir bhī hai un se mujhe ik ḳhaas nisbat dekhnā

mujh se ‘isyāñ-kār kī bhī parda-poshī ho ga.ī

dekhnā gunjā.ish-e-dāmān-e-rahmat dekhnā

sar se pā tak ġharq-e-'isyāñ jis ko kahte haiñ 'hazīñ'

aaj vo bhī mad.h-ḳhvāñ hai ye sa'ādat dekhnā

jitne Tapke aankh se ashk-e-nadamat dekhna

ban gae sab mash'al-e-nur-e-hidayat dekhna

jazb-e-ulfat dekhna shan-e-'aqidat dekhna

ho gai ba-wasf-e-duri un se qurbat dekhna

dil ki har hasrat had-e-lafz-o-bayan mein aa gai

kitni ma'ni-KHez hai ek un ki hasrat dekhna

un ka nam aate hi lab par aankh pur-nam ho gai

mere jazbaat-e-‘aqidat ki nazakat dekhna

wo shah-e-kaunain aur main ek gada-e-be-nawa

phir bhi hai un se mujhe ek KHas nisbat dekhna

mujh se ‘isyan-kar ki bhi parda-poshi ho gai

dekhna gunjaish-e-daman-e-rahmat dekhna

sar se pa tak gharq-e-'isyan jis ko kahte hain 'hazin'

aaj wo bhi madh-KHwan hai ye sa'adat dekhna