kar lo nabi ke ishq ka sauda kisi tarah

kar lo nabī ke 'ishq kā saudā kisī tarah

is kārobār meñ nahīñ ghāTā kisī tarah

jī chāhtā hai jā ke madīne meñ paḌ rahūñ

duniyā se chhūT jaa.e jo pīchhā kisī tarah

shādābiyoñ se vādī-e-jāñ mo'tabar karūñ

āñkhoñ meñ rakh luuñ gumbad-e-ḳhazrā kisī tarah

kā'be kī 'azmatoñ se zarā haT ke sochiye

makke se kam nahīñ hai madīna kisī tarah

vo naqsh-e-pā jo raste se mujh ko lagā ga.e

be-rāh kar na paa.ī ye duniyā kisī tarah

jab tak jhukāv dil kā nabī kī taraf na ho

puurā na hogā koī bhī sajda kisī tarah

bechain kar rahī hai ziyārat kī aarzū

ho ḳhatm zindagī kā jhamelā kisī tarah

rakkhī ḳhudā ne is liye lazzat darūd meñ

bahle firāq meñ dil-e-shaidā kisī tarah

kashtī ko aag ham bhī lagā dete ai 'ra.īs'

karte jo paar hijr kā dariyā kisī tarah

kar lo nabi ke 'ishq ka sauda kisi tarah

is karobar mein nahin ghaTa kisi tarah

ji chahta hai ja ke madine mein paD rahun

duniya se chhuT jae jo pichha kisi tarah

shadabiyon se wadi-e-jaan mo'tabar karun

aankhon mein rakh lun gumbad-e-KHazra kisi tarah

ka'be ki 'azmaton se zara haT ke sochiye

makke se kam nahin hai madina kisi tarah

wo naqsh-e-pa jo raste se mujh ko laga gae

be-rah kar na pai ye duniya kisi tarah

jab tak jhukaw dil ka nabi ki taraf na ho

pura na hoga koi bhi sajda kisi tarah

bechain kar rahi hai ziyarat ki aarzu

ho KHatm zindagi ka jhamela kisi tarah

rakkhi KHuda ne is liye lazzat darud mein

bahle firaq mein dil-e-shaida kisi tarah

kashti ko aag hum bhi laga dete ai 'rais'

karte jo par hijr ka dariya kisi tarah