kiya tha nur jab allah ne paida mohammad ka

kiyā thā nuur jab allāh ne paidā mohammad kā

usī din se huā hai āshiq-e-shaidā mohammad kā

na ho zikr-e-mubārak aap kā vird-e-zabāñ kyūñkar

maiñ huuñ roz-e-azal se āshiq-e-shaidā mohammad kā

farishte qabr meñ pūchheñge gar mujh se to kah dūñgā

ki huuñ banda ḳhudā kā aur huuñ shaidā mohammad kā

ḳhudāyā jab mirī is qālib-e-ḳhākī se jaañ nikle

zabāñ par us ghaḌī jaarī rahe kalima mohammad kā

ḳhayāl-e-mehr-o-mah dil se to fauran bhuul jā.egā

nazar aa jā.egā jis dam tujhe rauza mohammad kā

bashar kī tāb-o-tāqat kyā jo likkhe na.at-e-ahmad ko

ḳhudā hī jāntā hai ḳhuub bas rutba mohammad kā

ḳhudā ne zāt-e-ahmad ko vo a.alā martaba baḳhshā

ki dam bharte haiñ har-dam hazrat-e-īsā mohammad kā

malā.ik ne kiyā thā is sabab se sajda-e-ādam

ki peshānī se un kī nuur thā paidā mohammad kā

ḳhudā bhī hashr meñ pūchhegā gar āshiq tū kis kā hai

to kah dūñgā mohammad kā mohammad kā mohammad kā

tamanna hai ki fauran jāñ-ba-haq taslīm ho jā.ūñ

nazar aa.e jo mujh ko 'shefta' rauza mohammad kā

kiya tha nur jab allah ne paida mohammad ka

usi din se hua hai aashiq-e-shaida mohammad ka

na ho zikr-e-mubarak aap ka wird-e-zaban kyunkar

main hun roz-e-azal se aashiq-e-shaida mohammad ka

farishte qabr mein puchhenge gar mujh se to kah dunga

ki hun banda KHuda ka aur hun shaida mohammad ka

KHudaya jab meri is qalib-e-KHaki se jaan nikle

zaban par us ghaDi jari rahe kalima mohammad ka

KHayal-e-mehr-o-mah dil se to fauran bhul jaega

nazar aa jaega jis dam tujhe rauza mohammad ka

bashar ki tab-o-taqat kya jo likkhe nat-e-ahmad ko

KHuda hi jaanta hai KHub bas rutba mohammad ka

KHuda ne zat-e-ahmad ko wo aala martaba baKHsha

ki dam bharte hain har-dam hazrat-e-isa mohammad ka

malaik ne kiya tha is sabab se sajda-e-adam

ki peshani se un ki nur tha paida mohammad ka

KHuda bhi hashr mein puchhega gar aashiq tu kis ka hai

to kah dunga mohammad ka mohammad ka mohammad ka

tamanna hai ki fauran jaan-ba-haq taslim ho jaun

nazar aae jo mujh ko 'shefta' rauza mohammad ka