main to KHud un ke dar ka gada hun apne aaqa ko main nazr kya dun

maiñ to ḳhud un ke dar kā gadā huuñ apne aaqā ko maiñ nazr kyā duuñ

ab to āñkhoñ meñ kuchh bhī nahīñ hai varna qadmoñ meñ āñkheñ bichhā duuñ

aane vaalī hai un kī savārī phuul na.atoñ ke ghar ghar sajā duuñ

mere ghar meñ añdherā bahut hai apnī palkoñ pe sham.eñ jalā duuñ

merī jholī meñ kuchh bhī nahīñ hai merā sarmāya hai to yahī hai

apnī āñkhoñ kī chāñdī bahā duuñ apne māthe kā sonā luTā duuñ

be-nigāhī pe merī na jaa.eñ dīda-var mere nazdīk aa.eñ

maiñ yahīñ se madīna dikhā duuñ dekhne kā salīqa sikhā duuñ

rauza-e-pāk pesh-e-nazar hai sāmne mere aaqā kā dar hai

mujh ko kyā kuchh nazar aa rahā hai tum ko lafzoñ meñ kaise batā duuñ

qāfile jā rahe haiñ madīne aur hasrat se maiñ tak rahā huuñ

yā lipaT jā.ūñ qadmoñ se un ke yā qazā ko maiñ apnī sadā duuñ

merī baḳhshish kā sāmāñ yahī hai aur dil kā bhī armāñ yahī hai

ek din un kī ḳhidmat meñ jā kar un kī na.ateñ unhī ko sunā duuñ

mere aañsū bahut qīmtī haiñ in se vābasta haiñ un kī yādeñ

in kī manzil hai ḳhāk-e-madīna ye guhar yuuñ hī kaise luTā duuñ

mujh ko 'iqbāl' nisbat hai un se jin kā har lafz jān-e-suḳhan hai

maiñ jahāñ na.at apnī sunā duuñ saarī mahfil kī mahfil jagā duuñ

main to KHud un ke dar ka gada hun apne aaqa ko main nazr kya dun

ab to aankhon mein kuchh bhi nahin hai warna qadmon mein aankhen bichha dun

aane wali hai un ki sawari phul naton ke ghar ghar saja dun

mere ghar mein andhera bahut hai apni palkon pe shamen jala dun

meri jholi mein kuchh bhi nahin hai mera sarmaya hai to yahi hai

apni aankhon ki chandi baha dun apne mathe ka sona luTa dun

be-nigahi pe meri na jaen dida-war mere nazdik aaen

main yahin se madina dikha dun dekhne ka saliqa sikha dun

rauza-e-pak pesh-e-nazar hai samne mere aaqa ka dar hai

mujh ko kya kuchh nazar aa raha hai tum ko lafzon mein kaise bata dun

qafile ja rahe hain madine aur hasrat se main tak raha hun

ya lipaT jaun qadmon se un ke ya qaza ko main apni sada dun

meri baKHshish ka saman yahi hai aur dil ka bhi arman yahi hai

ek din un ki KHidmat mein ja kar un ki naten unhi ko suna dun

mere aansu bahut qimti hain in se wabasta hain un ki yaaden

in ki manzil hai KHak-e-madina ye guhar yun hi kaise luTa dun

mujh ko 'iqbaal' nisbat hai un se jin ka har lafz jaan-e-suKHan hai

main jahan nat apni suna dun sari mahfil ki mahfil jaga dun