mohabbat mein unki madine chala hun

mohabbat meñ un kī madīne chalā huuñ

qasam zindagī kī maiñ jiine chalā huuñ

kināre lagā.eñge in ko vo ḳhud hī

maiñ armāñ ke le kar safīne chalā huuñ

mileñ mujh ko kuchh tār-e-anvār-e-jalva

maiñ zaḳhm-e-ġham-e-hijr siine chalā huuñ

madīne pahuñch kar hī kam hogī vahshat

ki jaib-o-garebāñ ko siine chalā huuñ

hai ghanghor chhāyā huā abr-e-rahmat

mai-e-ishq-e-ahmad ko piine chalā huuñ

ba-zauq-e-aqīdat ba-josh-e-aqīdat

tirī samt ko ai madīne chalā huuñ

mubārak ho mujh ko ye ḳhvāb-e-ibādat

maiñ 'bahzād' goyā madīne chalā huuñ

mohabbat mein un ki madine chala hun

qasam zindagi ki main jine chala hun

kinare lagaenge in ko wo KHud hi

main arman ke le kar safine chala hun

milen mujh ko kuchh tar-e-anwar-e-jalwa

main zaKHm-e-gham-e-hijr sine chala hun

madine pahunch kar hi kam hogi wahshat

ki jaib-o-gareban ko sine chala hun

hai ghanghor chhaya hua abr-e-rahmat

mai-e-ishq-e-ahmad ko pine chala hun

ba-zauq-e-aqidat ba-josh-e-aqidat

teri samt ko ai madine chala hun

mubarak ho mujh ko ye KHwab-e-ibaadat

main 'bahzad' goya madine chala hun