nabi kaun yani rasul-e-karim

nabī kaun ya.anī rasūl-e-karīm

nubuvvat ke dariyā kā durr-e-yatīm

huā go ki zāhir meñ ummī laqab

pe 'ilm-e-ladunnī khulā dil pe sab

baġhair az likhe aur kahe be-raqam

chale hukm par us ke lauh-o-qalam

kiyā haq ne nabiyoñ kā sardār use

banāyā nubuvvat kā haqdār use

nubuvvat jo kī haq ne us par tamām

likhā ashrafunnās ḳhair-ul-anām

banāyā samajh-būjh kar ḳhuub use

ḳhudā ne kiyā apnā mahbūb use

kahūñ us ke rutbe kā kyā maiñ bayāñ

khaḌe hoñ jahāñ bāñdh saf mursalāñ

mohammad ke mānind jag meñ nahīñ

huā hai na aisā na hogā kahīñ

ye thā ramz us ke jo saayā na thā

ki rang-e-duī vaañ tak aaya na thā

na hone kā saa.e ke thā ye sabab

huā sarf ka.abe kī poshish meñ sab

na Daalī kisī shaḳhs par apnī chhāñv

kisī kā na muñh dekhā dekh us ke paañv

vo hotā zamīñ-gīr kyā farsh par

qadam us ke saa.e kā thā arsh par

jahāñ tak ke the yaañ ke ahl-e-nazar

samajh māya-e-nūr kuhl-ul-basar

sabhoñ ne liyā putliyoñ se uThā

zamīñ par na saa.e ko girne diyā

siyāhī kī putlī kā hai ye sabab

vahī saaya phirtā hai āñkhoñ meñ ab

vagarna ye thī chashm apnī kahāñ

usī se to raushan hai saarā jahāñ

nabi kaun yani rasul-e-karim

nubuwwat ke dariya ka durr-e-yatim

hua go ki zahir mein ummi laqab

pe 'ilm-e-ladunni khula dil pe sab

baghair az likhe aur kahe be-raqam

chale hukm par us ke lauh-o-qalam

kiya haq ne nabiyon ka sardar use

banaya nubuwwat ka haqdar use

nubuwwat jo ki haq ne us par tamam

likha ashrafunnas KHair-ul-anam

banaya samajh-bujh kar KHub use

KHuda ne kiya apna mahbub use

kahun us ke rutbe ka kya main bayan

khaDe hon jahan bandh saf mursalan

mohammad ke manind jag mein nahin

hua hai na aisa na hoga kahin

ye tha ramz us ke jo saya na tha

ki rang-e-dui wan tak aaya na tha

na hone ka sae ke tha ye sabab

hua sarf kabe ki poshish mein sab

na Dali kisi shaKHs par apni chhanw

kisi ka na munh dekha dekh us ke panw

wo hota zamin-gir kya farsh par

qadam us ke sae ka tha arsh par

jahan tak ke the yan ke ahl-e-nazar

samajh maya-e-nur kuhl-ul-basar

sabhon ne liya putliyon se uTha

zamin par na sae ko girne diya

siyahi ki putli ka hai ye sabab

wahi saya phirta hai aankhon mein ab

wagarna ye thi chashm apni kahan

usi se to raushan hai sara jahan