sarkar-e-madina ki mahfil jo sajai hai

sarkār-e-madīna kī mahfil jo sajā.ī hai

rahmat kī ghaTā ghir kar kis shaan se aa.ī hai

lau sarvar-e-‘ālam se ham ne to lagā.ī hai

duniyā se hai kyā lenā duniyā to parā.ī hai

duniyā meñ koī merī fariyād nahīñ suntā

ai rahmat-e-'ālam ab terī hī duhā.ī hai

har aan madīne kī rahtī hai lagan dil meñ

ye dard-e-judā.ī bhī kyā dard-e-judā.ī hai

is gumbad-e-ḳhazrā kā kyā vasf bayāñ ho

shāyad ki madīne meñ jannat utar aa.ī hai

kyā hai jo madīna hai ojhal mirī nazroñ se

us arz-e-muqaddas tak dil kī to rasā.ī hai

ai kaash 'hazīñ' par ab rahmat kī nazar ho jaa.e

zahmat to bahut is ne duniyā meñ uThā.ī hai

sarkar-e-madina ki mahfil jo sajai hai

rahmat ki ghaTa ghir kar kis shan se aai hai

lau sarwar-e-‘alam se hum ne to lagai hai

duniya se hai kya lena duniya to parai hai

duniya mein koi meri fariyaad nahin sunta

ai rahmat-e-'alam ab teri hi duhai hai

har aan madine ki rahti hai lagan dil mein

ye dard-e-judai bhi kya dard-e-judai hai

is gumbad-e-KHazra ka kya wasf bayan ho

shayad ki madine mein jannat utar aai hai

kya hai jo madina hai ojhal meri nazron se

us arz-e-muqaddas tak dil ki to rasai hai

ai kash 'hazin' par ab rahmat ki nazar ho jae

zahmat to bahut is ne duniya mein uThai hai