satati hi rahe ya-rab mujhe furqat mohammad ki

satātī hī rahe yā-rab mujhe furqat mohammad kī

machaltī hī rahe dil meñ mire hasrat mohammad kī

hai vaj.h-e-āfrīnash asl meñ be'sat mohammad kī

zarūrī thī jahāñ ke vāste ḳhilqat mohammad kī

hamāre vāste kaafī yahī baḳhshish kā sāmāñ hai

ḳhudāyā dekh leñ ham hashr meñ sūrat mohammad kī

ḳhudā kī shaan aur us kī buzurgī kā to kyā kahnā

magar kuchh kam nahīñ apnī jagah 'azmat mohammad kī

phireñge baḳhshish-e-ummat kī ḳhātir hashr meñ har-sū

are tauba ye hālat aur ye kaifiyyat mohammad kī

bazāhir aap kī be-hurmatī kī jin pe tohmat hai

ba-bātin karte haiñ vo log bhī vaq'at mohammad kī

hamāre jannatī hone meñ kuchh shak ho nahīñ saktā

mohammad ke 'hazīñ' jab ham haiñ aur jannat mohammad kī

satati hi rahe ya-rab mujhe furqat mohammad ki

machalti hi rahe dil mein mere hasrat mohammad ki

hai wajh-e-afrinash asl mein be'sat mohammad ki

zaruri thi jahan ke waste KHilqat mohammad ki

hamare waste kafi yahi baKHshish ka saman hai

KHudaya dekh len hum hashr mein surat mohammad ki

KHuda ki shan aur us ki buzurgi ka to kya kahna

magar kuchh kam nahin apni jagah 'azmat mohammad ki

phirenge baKHshish-e-ummat ki KHatir hashr mein har-su

are tauba ye haalat aur ye kaifiyyat mohammad ki

bazahir aap ki be-hurmati ki jin pe tohmat hai

ba-baatin karte hain wo log bhi waq'at mohammad ki

hamare jannati hone mein kuchh shak ho nahin sakta

mohammad ke 'hazin' jab hum hain aur jannat mohammad ki