uTha do parda dikha do jalwa ki nur-e-bari hijab mein hai

uThā do parda dikhā do jalva ki nūr-e-bārī hijāb meñ hai

zamāna tārīk ho rahā hai ki mehr kab se naqāb meñ hai

unhīñ kī bū māya-e-saman hai unhīñ kā jalva chaman chaman hai

unhīñ se gulshan mahak rahe haiñ unhīñ kī rangat gulāb meñ hai

vo gul haiñ lab-hā-e-nāzuk un ke hazāroñ jhaḌte haiñ phuul un se

gulāb gulshan meñ dekhe bulbul ye dekh gulshan gulāb meñ hai

khaḌe haiñ munkir-nakīr sar par na koī haamī na koī yāvar

batā do aa kar mire payambar ki saḳht mushkil javāb meñ hai

ḳhudā-e-qahhār hai ġhazab par khule haiñ bad-kāriyoñ ke daftar

bachā lo aa kar shafī-e-mahshar tumhārā banda azaab meñ hai

gunah kī tārīkiyāñ haiñ chhā.īñ umañD ke kaalī ghaTā.eñ aa.iiñ

ḳhudā ke ḳhurshīd mehr farmā ki zarra bas iztirāb meñ hai

karīm apne karam kā sadqa la.īm-e-be-qadr ko na sharmā

tū aur 'razā' se hisāb māñge 'razā' bhī koī hisāb meñ hai

uTha do parda dikha do jalwa ki nur-e-bari hijab mein hai

zamana tarik ho raha hai ki mehr kab se naqab mein hai

unhin ki bu maya-e-saman hai unhin ka jalwa chaman chaman hai

unhin se gulshan mahak rahe hain unhin ki rangat gulab mein hai

wo gul hain lab-ha-e-nazuk un ke hazaron jhaDte hain phul un se

gulab gulshan mein dekhe bulbul ye dekh gulshan gulab mein hai

khaDe hain munkir-nakir sar par na koi hami na koi yawar

bata do aa kar mere payambar ki saKHt mushkil jawab mein hai

KHuda-e-qahhaar hai ghazab par khule hain bad-kariyon ke daftar

bacha lo aa kar shafi-e-mahshar tumhaara banda azab mein hai

gunah ki tarikiyan hain chhain umanD ke kali ghaTaen aain

KHuda ke KHurshid mehr farma ki zarra bas iztirab mein hai

karim apne karam ka sadqa laim-e-be-qadr ko na sharma

tu aur 'raza' se hisab mange 'raza' bhi koi hisab mein hai