wahan pahunch ke ye kahna saba salam ke baad

vahāñ pahuñch ke ye kahnā sabā salām ke ba.ad

tumhāre naam kī raT hai ḳhudā ke naam ke baad

shab-e-visāl bayān-e-ġham-e-firāq abas

fuzūl hai gila-e-zaḳhm iltiyām ke baad

vahāñ bhī vāda-e-dīdār is tarah Taalā

ki log ḳhās-talab hoñge bār-e-ām ke baad

gunāhgār kī sun lo to saaf saaf hai ye

ki lutf-e-rahm-o-karam kyā phir intiqām ke ba.ad

talab tamām ho matlūb kī agar had ho

lagā huā hai yahāñ kuuch har maqām ke baad

vo ḳhatt o chehra vo zulf-e-siyāh to dekho

ki shaam sub.h ke baad aa.ī sub.h shaam ke baad

tujhe kahe koī kyūñkar na ġhairat-e-īsā

rahā na hosh kisī ko tire kalām ke baad

payām-bar ko ravāna kiyā to rashk aaya

na ham-kalām ho us se mire kalām ke baad

tamām hoñ abhī jhagḌe ye lan-tarānī ke

dikhā do jalva ḳhudārā agar kalām ke baad

abhī to dekhte haiñ zarf bāda-ḳhvāroñ kā

subū-o-ḳhum kī bhī Thahregī daur-e-jām ke baa'd

ilāhī 'āsī'-e-be-tāb kis se chhūTā hai

ki ḳhat meñ roz-e-qayāmat likhā hai naam ke ba.ad

wahan pahunch ke ye kahna saba salam ke baad

tumhaare nam ki raT hai KHuda ke nam ke baad

shab-e-visal bayan-e-gham-e-firaq abas

fuzul hai gila-e-zaKHm iltiyam ke baad

wahan bhi wada-e-didar is tarah Tala

ki log KHas-talab honge bar-e-am ke baad

gunahgar ki sun lo to saf saf hai ye

ki lutf-e-rahm-o-karam kya phir intiqam ke baad

talab tamam ho matlub ki agar had ho

laga hua hai yahan kuch har maqam ke baad

wo KHatt o chehra wo zulf-e-siyah to dekho

ki sham subh ke baad aai subh sham ke baad

tujhe kahe koi kyunkar na ghairat-e-isa

raha na hosh kisi ko tere kalam ke baad

payam-bar ko rawana kiya to rashk aaya

na ham-kalam ho us se mere kalam ke baad

tamam hon abhi jhagDe ye lan-tarani ke

dikha do jalwa KHudara agar kalam ke baad

abhi to dekhte hain zarf baada-KHwaron ka

subu-o-KHum ki bhi Thahregi daur-e-jam ke ba'd

ilahi 'asi'-e-be-tab kis se chhuTa hai

ki KHat mein roz-e-qayamat likha hai nam ke baad