ye qumqume ye ujale ye rang-o-bu kya hai

ye qumqume ye ujāle ye rang-o-bū kyā hai

nabī kā nuur nahīñ hai to chār-sū kyā hai

ye bū-e-gul ye chañbelī ye bhīnī bhīnī mahak

faqat nabī kā pasīna hai rang-o-bū kyā hai

unhīñ kā khāte ho un hī kī rahmatoñ se mafar

tumhīñ kaho ki ye andāz-e-guftugū kyā hai

sabā zarūr madīne se ho ke aa.ī hai

ye ḳhushbū ḳhushbū havāoñ meñ chār-sū kyā hai

ba-rū-e-chashm-e-tamannā ho gumbad-e-ḳhazrā

is aarzū ke sivā aur aarzū kyā hai

yahī kahūñgā sadā maiñ rahūñ ġhulām-e-nabī

ḳhudā jo pūchhegā mujh se ki aarzū kyā hai

jahāñ pe jaate haiñ qudsī bhī sar jhukā.e 'shamīm'

vahāñ pe kyā tirī auqāt aur tū kyā hai

ye qumqume ye ujale ye rang-o-bu kya hai

nabi ka nur nahin hai to chaar-su kya hai

ye bu-e-gul ye chanbeli ye bhini bhini mahak

faqat nabi ka pasina hai rang-o-bu kya hai

unhin ka khate ho un hi ki rahmaton se mafar

tumhin kaho ki ye andaz-e-guftugu kya hai

saba zarur madine se ho ke aai hai

ye KHushbu KHushbu hawaon mein chaar-su kya hai

ba-ru-e-chashm-e-tamanna ho gumbad-e-KHazra

is aarzu ke siwa aur aarzu kya hai

yahi kahunga sada main rahun ghulam-e-nabi

KHuda jo puchhega mujh se ki aarzu kya hai

jahan pe jate hain qudsi bhi sar jhukae 'shamim'

wahan pe kya teri auqat aur tu kya hai