vasiyyat

us vaqt jab tum kisii vaadii me.n kaasht kii ga.ii

jald ug aane vaalii fasl kaaTte hu.e

ko.ii lok-giit gungunaa rahii thii.n

mai.n jang par ravaana ho chukaa thaa

mere saamaan-e-harb me.n ek zang-aaluud talvaar

aur tumhaare boso.n se sajii hu.ii zirah hai

mai.n ne sanglaaKH zamiino.n me.n gulaab bone

aur pahaa.Do.n kii choTiyo.n par sabza ugaane ke liye

dasht ke siine par se nadii guzaarii hai

mai.n ne munjamid samundaro.n par safar kiyaa hai

jin kaa namkiin paanii jahaazo.n ke pende nigal jaataa hai

mere paa.nv is taviil masaafat se chuur hai.n

meraa lahja raah kii zaalim havaa ke thape.De khaa kar saKHt ho gayaa hai

mere lafz khurdure ho chuke hai.n

aise lafz sirf jang ke maidaan ke liye hote hai.n

tumhaarii aa.nkho.n par nazm kahne

aur tum se mohabbat ke iz.haar ke liye nahii.n

merii vo nazme.n jo kabhii kisii ne nahii.n gungunaa.ii.n

mere vo KHutuut jo kabhii kahii.n nahii.n bheje ga.e

mere saath us qabr me.n dafn kiye jaa.e.n

jis par kabhii ko.ii katba nahii.n lagegaa

faateh fauj ke gho.Do.n ke nathuno.n se nikaltii garm saa.ns

haDDiyo.n kaa guudaa aur chehre kaa maas siyaah kar rahii hai

vaqt kaa naa-hamvaar pahiyo.n vaalaa rath

KHvaahisho.n ke narm jism par chalaayaa jaa rahaa hai

is se pahle ki ko.ii tiir merii e.Dii me.n lage

mai.n vasiyyat kartaa huu.n

merii zirah ke husuul ke liye ko.ii jang na la.Dii jaa.e

us vaqt jab tum kisii vaadii me.n kaasht kii ga.ii

jald ug aane vaalii fasl kaaTte hu.e

ko.ii lok-giit gungunaa rahii thii.n

mai.n jang par ravaana ho chukaa thaa

mere saamaan-e-harb me.n ek zang-aaluud talvaar

aur tumhaare boso.n se sajii hu.ii zirah hai

mai.n ne sanglaaKH zamiino.n me.n gulaab bone

aur pahaa.Do.n kii choTiyo.n par sabza ugaane ke liye

dasht ke siine par se nadii guzaarii hai

mai.n ne munjamid samundaro.n par safar kiyaa hai

jin kaa namkiin paanii jahaazo.n ke pende nigal jaataa hai

mere paa.nv is taviil masaafat se chuur hai.n

meraa lahja raah kii zaalim havaa ke thape.De khaa kar saKHt ho gayaa hai

mere lafz khurdure ho chuke hai.n

aise lafz sirf jang ke maidaan ke liye hote hai.n

tumhaarii aa.nkho.n par nazm kahne

aur tum se mohabbat ke iz.haar ke liye nahii.n

merii vo nazme.n jo kabhii kisii ne nahii.n gungunaa.ii.n

mere vo KHutuut jo kabhii kahii.n nahii.n bheje ga.e

mere saath us qabr me.n dafn kiye jaa.e.n

jis par kabhii ko.ii katba nahii.n lagegaa

faateh fauj ke gho.Do.n ke nathuno.n se nikaltii garm saa.ns

haDDiyo.n kaa guudaa aur chehre kaa maas siyaah kar rahii hai

vaqt kaa naa-hamvaar pahiyo.n vaalaa rath

KHvaahisho.n ke narm jism par chalaayaa jaa rahaa hai

is se pahle ki ko.ii tiir merii e.Dii me.n lage

mai.n vasiyyat kartaa huu.n

merii zirah ke husuul ke liye ko.ii jang na la.Dii jaa.e