gandhi ji ki yaad mein

sulūk-e-nāravā-e-dār-e-fānī dekhte jaao

hamārā haal bhī ai āñ-jahānī dekhte jaao

na jaane tum kahāñ jā kar achānak ho ga.e pinhāñ

paḌī ham par jo aafat nā-gahānī dekhte jaao

bapā hai har taraf mātam siyah-poshī hai har jānib

zamāna kar rahā hai nauha-ḳhvānī dekhte jaao

suhāgan thā tire dam se ye hindustān ai baapū

huī barbād ab is kī javānī dekhte jaao

kabhī Daalo nazar hindostāñ ke baḳht-e-ḳhufta par

zarā nākāmiyoñ kī kāmrānī dekhte jaao

bahāreñ luT ga.iiñ saarī kī saarī vā.e-nākāmī

ḳhizāñ kī har taraf hai hukmrānī dekhte jaao

umīdoñ kā shajar murjhā gayā ham hind vāloñ kī

nihāl-e-ārzū kī ye nishānī dekhte jaao

jahāñ josh-e-nashāt-o-aish kī har-sū hukūmat thī

vahāñ yās-o-alam kī hukmrānī dekhte jaao

chaman meñ har taraf thī justujū gul kī anādil ko

faqat sayyād ko thī bad-gumānī dekhte jaao

tumheñ to dar-haqīqat chain hāsil ho gayā lekin

hamāre bahr-e-ġham kī be-karānī dekhte jaao

kahīñ koī nazar aatā nahīñ kis se kahe 'shāhid'

ḳhudārā hālat-e-dard-e-nihānī dekhte jaao

suluk-e-narawa-e-dar-e-fani dekhte jao

hamara haal bhi ai aan-jahani dekhte jao

na jaane tum kahan ja kar achanak ho gae pinhan

paDi hum par jo aafat na-gahani dekhte jao

bapa hai har taraf matam siyah-poshi hai har jaanib

zamana kar raha hai nauha-KHwani dekhte jao

suhagan tha tere dam se ye hindustan ai bapu

hui barbaad ab is ki jawani dekhte jao

kabhi Dalo nazar hindostan ke baKHt-e-KHufta par

zara nakaamiyon ki kaamrani dekhte jao

bahaaren luT gain sari ki sari wae-nakaami

KHizan ki har taraf hai hukmrani dekhte jao

umidon ka shajar murjha gaya hum hind walon ki

nihaal-e-arzu ki ye nishani dekhte jao

jahan josh-e-nashat-o-aish ki har-su hukumat thi

wahan yas-o-alam ki hukmrani dekhte jao

chaman mein har taraf thi justuju gul ki anadil ko

faqat sayyaad ko thi bad-gumani dekhte jao

tumhein to dar-haqiqat chain hasil ho gaya lekin

hamare bahr-e-gham ki be-karani dekhte jao

kahin koi nazar aata nahin kis se kahe 'shahid'

KHudara haalat-e-dard-e-nihani dekhte jao