mahatma gandhi

ai faqīr-e-nīm-uryāñ ai vatan ke pāsbāñ

manzil-āsūda huā tere karam se kārvāñ

rashk-e-sad-shamshīr thā terā asā-e-be-zarar

us ke Dar se kāñpte the sāmrājī hukmrāñ

sehr thā terā takallum mo.ajiza terā sukūt

terī har tahrīr meñ thā ġhaib kā farmāñ nihāñ

qaum kī murda ragoñ meñ tū ne dauḌāyā lahū

hindiyoñ kī past himmat ko kiyā phir se javāñ

thā ḳhizāñ kā daur-daura ḳhema-zan sayyād the

tere dam se ban gayā sehn-e-chaman rashk-e-jināñ

hind kyā terī badaulat asia bedār hai

ek duniyā māntī hai terā ehsān-e-girāñ

thī farishtoñ se bhī bartar pāk-dāmānī tirī

nūr-e-bātin se tire raushan hue kaun-o-makāñ

aadmī ne tujh se sīkhā ihtirām-e-ādmī

ġhairiyat kā hind se tū ne miTā Daalā nishāñ

do-jahāñ meñ aadmī kā bol-bālā kar diyā

ādamiyyat ke liye qurbān kar ke naqd-e-jāñ

ham ko terī rahnumā.ī kī zarūrat thī abhī

aur udhar takte the terī raah ahl-e-āsmāñ

ik sitam thā rāhi-e-mulk-e-adam honā tirā

ġham se sar piiTā zamīñ ne ḳhuun royā āsmāñ

ai faqir-e-nim-uryan ai watan ke pasban

manzil-asuda hua tere karam se karwan

rashk-e-sad-shamshir tha tera asa-e-be-zarar

us ke Dar se kanpte the samraji hukmran

sehr tha tera takallum moajiza tera sukut

teri har tahrir mein tha ghaib ka farman nihan

qaum ki murda ragon mein tu ne dauDaya lahu

hindiyon ki past himmat ko kiya phir se jawan

tha KHizan ka daur-daura KHema-zan sayyaad the

tere dam se ban gaya sehn-e-chaman rashk-e-jinan

hind kya teri badaulat asia bedar hai

ek duniya manti hai tera ehsan-e-giran

thi farishton se bhi bartar pak-damani teri

nur-e-baatin se tere raushan hue kaun-o-makan

aadmi ne tujh se sikha ihtiram-e-admi

ghairiyat ka hind se tu ne miTa Dala nishan

do-jahan mein aadmi ka bol-baala kar diya

aadamiyyat ke liye qurban kar ke naqd-e-jaan

hum ko teri rahnumai ki zarurat thi abhi

aur udhar takte the teri rah ahl-e-asman

ek sitam tha rahi-e-mulk-e-adam hona tera

gham se sar piTa zamin ne KHun roya aasman