chuna humne pahaDi rasta

chunā ham ne pahāḌī rāsta

aur samt kā bhārī salāsil toḌ kar

samtoñ kī nairañgī se ham vāqif hue

ubhrī chaTTānoñ se luḌhakne

ghāTiyoñ se karvaTeñ lene kī

ik bigḌī ravish

ham ne bhī apnā.ī

khaDDoñ kī tah meñ bahte pāniyoñ se

ham ne chalne kā chalan sīkhā

daraḳhtoñ aur phūloñ se

qatāreñ toḌne kī

aur havā se

muñh uThā kar apnī marzī se

ka.ī samtoñ meñ be-ārām hone kī adā sīkhī

zamāñ se ham ne sīkhā

sab zamānoñ meñ ravāñ honā

hameñ raas aa gayā kosoñ meñ chalnā

ufuq kī surma.ī mehrāb par nazreñ jamā.e

kisī sīdhī saḌak par

duur ik bastī ke siine se lage

barsoñ purāne

hichkiyāñ lete makāñ kī aur jaane kā junūñ

maddham paḌā

ham baT ga.e

chīḌhoñ kī shāḳhoñ se utartī katranoñ meñ

chunā ham ne pahāḌī rāsta

chuna hum ne pahaDi rasta

aur samt ka bhaari salasil toD kar

samton ki nairangi se hum waqif hue

ubhri chaTTanon se luDhakne

ghaTiyon se karwaTen lene ki

ek bigDi rawish

hum ne bhi apnai

khaDDon ki tah mein bahte paniyon se

hum ne chalne ka chalan sikha

daraKHton aur phulon se

qataren toDne ki

aur hawa se

munh uTha kar apni marzi se

kai samton mein be-aram hone ki ada sikhi

zaman se hum ne sikha

sab zamanon mein rawan hona

hamein ras aa gaya koson mein chalna

ufuq ki surmai mehrab par nazren jamae

kisi sidhi saDak par

dur ek basti ke sine se lage

barson purane

hichkiyan lete makan ki aur jaane ka junun

maddham paDa

hum baT gae

chiDhon ki shaKHon se utarti katranon mein

chuna hum ne pahaDi rasta