shafaq-gun sabza

baḌī taklīf thī tahrīr ko manzil pe laane meñ

tanāv kā ajab ik jaal sā phailā thā chehre par

khiñche the abrūoñ meñ sīdhe ḳhat

peshānī par aaḌī lakīreñ thiiñ

ḳhamīda hote gaahe lab

kabhī mizhgāñ ulajh paḌtī thiiñ bāham

girā kar parda-e-chashm apnī āñkhoñ par

ġharq ho jaatī sochoñ meñ

ki afsāne meñ dīvāne kā kyā anjām likkhūñ

aur usī meñ dopahar Dhal ga.ī

nazar khiḌkī kī jānib jab uThī to

dekhā shaam aatī hai azmat se

shajar patte ajab se nuur meñ raushan haiñ

shāmil haiñ bahut se rañg jis meñ

qurmuzī kirnoñ ne

sabze ko shafaq-gūñ sā mun.akis kar ke

malākūtī fazā meñ Dhaal kar

merī nigāhoñ tak baḌī ujlat se laayā hai

maiñ us ko dekhne meñ gar na kuchh pal ḳhud ko gum kartī

to māthe ke shikan chehre pe chhāyā ye tanāv

be-sukūñ āñkheñ

sabhī mil kar mire dil ko bujhā dete

baDi taklif thi tahrir ko manzil pe lane mein

tanaw ka ajab ek jal sa phaila tha chehre par

khinche the abruon mein sidhe KHat

peshani par aaDi lakiren thin

KHamida hote gahe lab

kabhi mizhgan ulajh paDti thin baham

gira kar parda-e-chashm apni aankhon par

gharq ho jati sochon mein

ki afsane mein diwane ka kya anjam likkhun

aur usi mein dopahar Dhal gai

nazar khiDki ki jaanib jab uThi to

dekha sham aati hai azmat se

shajar patte ajab se nur mein raushan hain

shamil hain bahut se rang jis mein

qurmuzi kirnon ne

sabze ko shafaq-gun sa munakis kar ke

malakuti faza mein Dhaal kar

meri nigahon tak baDi ujlat se laya hai

main us ko dekhne mein gar na kuchh pal KHud ko gum karti

to mathe ke shikan chehre pe chhaya ye tanaw

be-sukun aankhen

sabhi mil kar mere dil ko bujha dete