jila-watan ki wapsi

zamīn kā vajūd mere intizār meñ thā

merī sadā ko

raushnī kī shanāḳht ke liye sunā gayā

jo azalī pāniyoñ se

favvāre kī tarah phail rahī thī

maiñ tez tez

ābshār kī tarah zamīn ke muñh meñ gir rahā thā

zamīn kā muñh

gulāb ke phuul kī tarah havā meñ vā ho rahā thā

pahlī baar jab maiñ āsmān se girā thā

zamīn ne merī āvāz ko mausīqī kī tarah sunā thā

zamīn ke dil meñ dard kā dariyā thā

jis meñ maiñ ne janm liyā thā

ab maiñ apne andar se us raushnī ko yaad kartā huuñ

jo mere vajūd meñ ġhair-ma.amūlī ḳhāmoshī ke saath mahfūz hai

aur apnī pahlī maujūdgī ke saath

merī āñkhoñ meñ ubhar aatī hai

lekin maiñ is āvāz ko kabhī nahīñ pā sakūñgā

jo mere ghar kā sukūn hai

maiñ har roz apne aap ko chhoḌtā huuñ

ek zaḳhmī parinde kī tarah

jo band havā maiñ āsmān kī tarah uḌtā hai

aur ek jilā-vatan kī tarah saañs letā hai

zamin ka wajud mere intizar mein tha

meri sada ko

raushni ki shanaKHt ke liye suna gaya

jo azali paniyon se

fawware ki tarah phail rahi thi

main tez tez

aabshaar ki tarah zamin ke munh mein gir raha tha

zamin ka munh

gulab ke phul ki tarah hawa mein wa ho raha tha

pahli bar jab main aasman se gira tha

zamin ne meri aawaz ko mausiqi ki tarah suna tha

zamin ke dil mein dard ka dariya tha

jis mein main ne janm liya tha

ab main apne andar se us raushni ko yaad karta hun

jo mere wajud mein ghair-mamuli KHamoshi ke sath mahfuz hai

aur apni pahli maujudgi ke sath

meri aankhon mein ubhar aati hai

lekin main is aawaz ko kabhi nahin pa sakunga

jo mere ghar ka sukun hai

main har roz apne aap ko chhoDta hun

ek zaKHmi parinde ki tarah

jo band hawa main aasman ki tarah uDta hai

aur ek jila-watan ki tarah sans leta hai