aadarsh

ye ik sitārā

jo duur añdhere kī god meñ jagmagā rahā hai

kisī kā ghar hai

kisī kā ābād-o-pur-sukūñ ghar

ye usī kā ghar hai

jo merī mānind dar-ba-dar hai na be-sahārā

magar vo lākhoñ zamīn-zāde

ki jin ke bosīda ghar charāġhoñ kī raushnī ko

taras rahe haiñ

ki jin ke dīvār-o-dar inhīñ mausamoñ kī shiddat

masā.ib-o-ġham ke sail-e-be-mehr meñ

tahaffuz na de sake haiñ na de sakeñge

ki jin ke bachchoñ ne bhuuk se aur anaaj ugāne se

paa.ī fursat to dars-gāhoñ ke ḳhvāb dekhe

kahāñ har ik shaḳhs kā muqaddar qalam chhue aur kitāb dekhe

ye ḳhvāb ḳhvāboñ se baḌh na paa.e

vo likhne paḌhne kī aarzū le kar mar ga.e aur paḌh na paa.e

magar vo lākhoñ zamīn-zāde

jo shahr kī jagmagātī saḌkoñ pe

mauj-dar-mauj besh-qīmat javāhir-o-pairahan kī is dā.imī numā.ish ko

roz-o-shab hasrat-o-tahayyur se dekhte haiñ

phir un kī nazreñ ḳhud apne malbūs par

mashīnoñ ke tel ke daaġh DhūñDhtī haiñ

to phir ye hairat kī baat kab hai

ki maiñ bhī lākhoñ zamīn-zādoñ kī tarah ābād shāh-rāhoñ pe

zindagī aur raushnī DhūñDne kī ḳhātir bhaTak rahā huuñ

maiñ dar-ba-dar ho ke un ke ghar

ḳhushbuoñ se aur raushnī se bhar duuñ

maiñ dar-ba-dar ho ke

un ke bachchoñ pe marhale zindagī ke

mumkin hai sahl kar duuñ

maiñ un ke ḳhvāboñ ko sach kar duuñ

aur harf-o-āhang kī madad se

unheñ naved-e-bahār duuñ

sub.h kī tamanna diloñ meñ un ke utārūñ

kaash maiñ ufuq par

sunahre alfāz meñ bashārat likhūñ sahar kī

ye ho sake to mujhe tamanna nahīñ hai ghar kī

ye ek sitara

jo dur andhere ki god mein jagmaga raha hai

kisi ka ghar hai

kisi ka aabaad-o-pur-sukun ghar

ye usi ka ghar hai

jo meri manind dar-ba-dar hai na be-sahaara

magar wo lakhon zamin-zade

ki jin ke bosida ghar charaghon ki raushni ko

taras rahe hain

ki jin ke diwar-o-dar inhin mausamon ki shiddat

masaib-o-gham ke sail-e-be-mehr mein

tahaffuz na de sake hain na de sakenge

ki jin ke bachchon ne bhuk se aur anaj ugane se

pai fursat to dars-gahon ke KHwab dekhe

kahan har ek shaKHs ka muqaddar qalam chhue aur kitab dekhe

ye KHwab KHwabon se baDh na pae

wo likhne paDhne ki aarzu le kar mar gae aur paDh na pae

magar wo lakhon zamin-zade

jo shahr ki jagmagati saDkon pe

mauj-dar-mauj besh-qimat jawahir-o-pairahan ki is daimi numaish ko

roz-o-shab hasrat-o-tahayyur se dekhte hain

phir un ki nazren KHud apne malbus par

mashinon ke tel ke dagh DhunDhti hain

to phir ye hairat ki baat kab hai

ki main bhi lakhon zamin-zadon ki tarah aabaad shah-rahon pe

zindagi aur raushni DhunDne ki KHatir bhaTak raha hun

main dar-ba-dar ho ke un ke ghar

KHushbuon se aur raushni se bhar dun

main dar-ba-dar ho ke

un ke bachchon pe marhale zindagi ke

mumkin hai sahl kar dun

main un ke KHwabon ko sach kar dun

aur harf-o-ahang ki madad se

unhen nawed-e-bahaar dun

subh ki tamanna dilon mein un ke utarun

kash main ufuq par

sunahre alfaz mein bashaarat likhun sahar ki

ye ho sake to mujhe tamanna nahin hai ghar ki