aadhi maut ka janm

apne adhūre vajūd ke saath

maiñ ne apnī aadhī qabr maañ kī kokh meñ banā.ī

aur aadhī baap ke dil meñ

maiñ apnī donoñ qabroñ meñ

thoḌā thoḌā jī rahā huuñ

thoḌā thoḌā mar rahā huuñ

masīhā ne apne nusḳhe meñ

merī tahlīl kī tajvīz likhī hai

baabā ne mere dobāra janm kā mashvara māñgā

aur maañ ne mere be-nām katbe ko āñsuoñ se saaf kiyā

tab

mere adhūre aur puure janm kā faisla mujh par chhoḌ diyā gayā

do qabroñ meñ bane vajūd kā taḳhmīna lagāte hue

sochtā huuñ

kyā karūñ?

marne ke liye jī uThūñ?

yā jiine ke liye multavī ho jā.uñ?

pyāre ristho!

maiñ ek taraf duāoñ ke kafan meñ lipTā paḌā huuñ

aur dūsrī taraf

mere sirhāne sūraj-mukhī kā phuul dharā hai

apne adhure wajud ke sath

main ne apni aadhi qabr man ki kokh mein banai

aur aadhi bap ke dil mein

main apni donon qabron mein

thoDa thoDa ji raha hun

thoDa thoDa mar raha hun

masiha ne apne nusKHe mein

meri tahlil ki tajwiz likhi hai

baba ne mere dobara janm ka mashwara manga

aur man ne mere be-nam katbe ko aansuon se saf kiya

tab

mere adhure aur pure janm ka faisla mujh par chhoD diya gaya

do qabron mein bane wajud ka taKHmina lagate hue

sochta hun

kya karun?

marne ke liye ji uThun?

ya jine ke liye multawi ho jaun?

pyare ristho!

main ek taraf duaon ke kafan mein lipTa paDa hun

aur dusri taraf

mere sirhane suraj-mukhi ka phul dhara hai