aaghaz se anjam tak

in dinoñ merī zindagī

ek vīrāna thī

jis meñ tum ne pyaar ke be-shumār gul khilā.e the

rafta rafta ye vīrāna

gulshan ban kar mahakne lagā

har taraf shagufta tamannāoñ ke phuul bikhre the

kitnā nāzāñ thā maiñ apne nasīb par ki

merī rāhoñ meñ tamannāoñ ke phuul haiñ mahaktī kaliyāñ haiñ

dāman meñ sauġhāt hai tumhāre pyaar kī

magar aaj ma.alūm huā ummīd kā anjām

phuul khil kar pazhmurda zarūr hote haiñ

aur ab in dinoñ bhī

merī zindagī ek vīrāna hai

yās-o-hasrat kā mausam bikhrā paḌā hai

tamannāoñ ke lāshe bikhre hue haiñ

merā dāman āñsūoñ se pur hai

mere jazbe lahūluhān haiñ

āġhāz se le kar anjām tak

merā tasavvur

dhuāñ dhuāñ hai

in dinon meri zindagi

ek virana thi

jis mein tum ne pyar ke be-shumar gul khilae the

rafta rafta ye virana

gulshan ban kar mahakne laga

har taraf shagufta tamannaon ke phul bikhre the

kitna nazan tha main apne nasib par ki

meri rahon mein tamannaon ke phul hain mahakti kaliyan hain

daman mein saughat hai tumhaare pyar ki

magar aaj malum hua ummid ka anjam

phul khil kar pazhmurda zarur hote hain

aur ab in dinon bhi

meri zindagi ek virana hai

yas-o-hasrat ka mausam bikhra paDa hai

tamannaon ke lashe bikhre hue hain

mera daman aansuon se pur hai

mere jazbe lahuluhan hain

aaghaz se le kar anjam tak

mera tasawwur

dhuan dhuan hai