aagahi ka jal

mire apne hurūf kā jaal

mirī ruuh par tañg hotā jā rahā hai

aur ab to mirī ruuh kī haDDiyāñ

chaTaḳh rahī haiñ

aur sarāb-e-āgahī ke sāmne

sar paTaḳh rahī haiñ

''sukūt'' ke hurūf

jinhoñ ne merī samā.atoñ se

shor kā lahū nichoḌ liyā hai

ye ''raushnī'' ke hurūf

ki jinhoñ ne mirī aañkh ke

kāñch ke diyoñ meñ rakhā huā

tel pī liyā hai

ye ''zā.iqe'' ke hurūf

jinhoñ ne mirī zabān ko

laboñ ke darmiyān maar kar

dafn kar diyā hai

aur ye iztirāb

jis ne mere pair kī ragoñ kī jagah

safar kī ḳhvāhishoñ se banī sutliyāñ khīñch dī haiñ

aur ye āgahī

jis ne mirī ruuh kī bachī khuchī

haDDiyāñ bhī sameT dī haiñ

mere apne huruf ka jal

meri ruh par tang hota ja raha hai

aur ab to meri ruh ki haDDiyan

chaTaKH rahi hain

aur sarab-e-agahi ke samne

sar paTaKH rahi hain

sukut ke huruf

jinhon ne meri samaaton se

shor ka lahu nichoD liya hai

ye raushni ke huruf

ki jinhon ne meri aankh ke

kanch ke diyon mein rakha hua

tel pi liya hai

ye zaiqe ke huruf

jinhon ne meri zaban ko

labon ke darmiyan mar kar

dafn kar diya hai

aur ye iztirab

jis ne mere pair ki ragon ki jagah

safar ki KHwahishon se bani sutliyan khinch di hain

aur ye aagahi

jis ne meri ruh ki bachi khuchi

haDDiyan bhi sameT di hain