aaine nazar ke gard hue

jab dard ke naate TuuT ga.e

jab manzar manzar phaile hue

an-dekhe lambe hāthoñ ne

sab ahd purāne luuT liye

maazī ke ḳhazāne luuT liye

sab ishq ke da.ave ruuTh ga.e

jaañ guñg huī dil chhūT ga.e

har zaḳhm-e-tamannā raakh huā

jo sho.ala-e-jāñ tharrātā huā

shaffāf añdherī rātoñ meñ

raqsāñ thā falak ke ziine par

thak-hār ke āḳhir baiTh rahā

maTiyāle behis retīle in rastoñ par

vo raste

jin par rishtoñ ke

raushan chehre rū-posh hue

vo jin ke shor-sharābe meñ

man kī āvāz Duub ga.iiñ

dil ke hañgāme sard hue

ā.īne nazar ke gard hue

vo raste bhī kyā raste the

har chār-taraf

ik dhuñd kī ḳhākī chādar thī

aur us ke aage hadd-e-nazar tak

phailī huī

be-jāñ lafzoñ

be-mehr yugoñ kī

daldal thī

vo shola-e-raqsāñ hairāñ thā

vo dīda-e-hairāñ giryāñ thā

vo zehn-e-pareshāñ larzāñ thā

ik dil kā nagar so vīrāñ thā

ik raahī thā jo un be-mehr fazāoñ meñ

shauq-e-parvāz se

ḳhū-e-safar kī betābī se hirāsāñ thā

kuchh chāñd kī maddham kirneñ thiiñ

jo dard ke saare rāzoñ se

vāqif thiiñ magar

in maTiyāle behis gadle

rastoñ se

vo bhī gurezāñ thiiñ

jab dard ke nate TuT gae

jab manzar manzar phaile hue

an-dekhe lambe hathon ne

sab ahd purane luT liye

mazi ke KHazane luT liye

sab ishq ke dawe ruTh gae

jaan gung hui dil chhuT gae

har zaKHm-e-tamanna rakh hua

jo shoala-e-jaan tharraata hua

shaffaf andheri raaton mein

raqsan tha falak ke zine par

thak-haar ke aaKHir baiTh raha

maTiyale behis retile in raston par

wo raste

jin par rishton ke

raushan chehre ru-posh hue

wo jin ke shor-sharabe mein

man ki aawaz Dub gain

dil ke hangame sard hue

aaine nazar ke gard hue

wo raste bhi kya raste the

har chaar-taraf

ek dhund ki KHaki chadar thi

aur us ke aage hadd-e-nazar tak

phaili hui

be-jaan lafzon

be-mehr yugon ki

daldal thi

wo shola-e-raqsan hairan tha

wo dida-e-hairan giryan tha

wo zehn-e-pareshan larzan tha

ek dil ka nagar so viran tha

ek rahi tha jo un be-mehr fazaon mein

shauq-e-parwaz se

KHu-e-safar ki betabi se hirasan tha

kuchh chand ki maddham kirnen thin

jo dard ke sare raazon se

waqif thin magar

in maTiyale behis gadle

raston se

wo bhi gurezan thin