aaj insan kahan hai

maiñ huuñ jis kā shā.er

vo insān kahāñ hai

saarī duniyā jise māntī rahī hai

vo bhagvān kahāñ hai

hasīn chehre

phuul aur kaliyāñ

jhūmtī shāḳheñ

daraḳht āshiyāñ

hariyālī

nahreñ dariyā sāgar

ūñche ūñche kohsāroñ kī bulandiyāñ

nāchne vaale

hazār-hā rañgīn parinde

shaam o sahar ko phūlne vaalī shafaq

barkhā-rut kī sat-rañgī dhanak

sūraj chāñd sitāre

rātoñ ko jhilmilātī kahkashāñ

jin ke dekhe se

bahal jaa.eñ dil

sukh paa.eñ parān

ab vo dil vo sukh un parānoñ kā

nām-o-nishāñ kahāñ hai

meñ huuñ jis kā shā.er

vo insān kahāñ hai

saarī duniyā jise māntī rahī hai

vo bhagvān kahāñ hai

be-hisāb sadiyoñ kī āñkheñ

ek pal meñ

an-ginat baar jhapaktī palkeñ

nazar na aane vaalī nazreñ

chhātī se bachchoñ ko lipTā.e hue mātā.eñ

khanak-dār chūḌiyoñ bharī kalā.iyāñ

jin par duudh pilātī mātāoñ kī

jhukī huī sharmīlī āñkheñ

āñchaloñ meñ chhupe hue nanhe nanhe bālak

chorī chorī mātāoñ kā chehra tākeñ

javāniyoñ ke nainoñ se priit ke chalte baan

aaj us pyaar bhare

javān jiyoñ kā armān kahāñ hai

maiñ huuñ jis kā shā.er

vo insān kahāñ hai

vo insān kahāñ hai

aaj vo apnī dhartī apne jīvan kī barbādī kī

tayyārī meñ

veyast hai masrūf hai gum hai

bachchoñ ke komal badan ke TukḌe

hathiyāroñ ke vidhān kī jhāḌiyoñ jañgaloñ meñ

lā-vāris lāsheñ

jin ko

murdār-ḳhor peT bhare jānvar

khaa.e binā hī guzar jaa.eñ

phir khā.īñ kyūñkar

koī batā.e

kitnī ibādat-gāheñ

mandir

masjid

girjā ghar aur gurudvāre

kitnī jaldī Dhaa.e jā sakte haiñ

yā in sab ko halākatoñ ke saaz aur aslahoñ kā

godām banā denā behtar hai

be-gunāhoñ kā lahū zamīn meñ jazb nahīñ ho saktā

shāyad kabhī nahīñ

koī batā.e

kab ye zamīñ dobāra shola-zār banegī

kyā koī nahīñ hai

koī nahīñ?

jo apnī zamīn ko zindagī kī jannat banā sake

ik insānī tāqat

himmat ik azm ke saath

des des mulkoñ mulkoñ

maiñ insān ko lalkāroñgā

lekin maiñ huuñ jis kā shā.er

vo insān kahāñ hai

saarī duniyā jise māntī rahī hai vo bhagvān kahāñ hai?

main hun jis ka shaer

wo insan kahan hai

sari duniya jise manti rahi hai

wo bhagwan kahan hai

hasin chehre

phul aur kaliyan

jhumti shaKHen

daraKHt aashiyan

hariyali

nahren dariya sagar

unche unche kohsaron ki bulandiyan

nachne wale

hazar-ha rangin parinde

sham o sahar ko phulne wali shafaq

barkha-rut ki sat-rangi dhanak

suraj chand sitare

raaton ko jhilmilati kahkashan

jin ke dekhe se

bahal jaen dil

sukh paen paran

ab wo dil wo sukh un paranon ka

nam-o-nishan kahan hai

mein hun jis ka shaer

wo insan kahan hai

sari duniya jise manti rahi hai

wo bhagwan kahan hai

be-hisab sadiyon ki aankhen

ek pal mein

an-ginat bar jhapakti palken

nazar na aane wali nazren

chhati se bachchon ko lipTae hue mataen

khanak-dar chuDiyon bhari kalaiyan

jin par dudh pilati mataon ki

jhuki hui sharmili aankhen

aanchalon mein chhupe hue nanhe nanhe baalak

chori chori mataon ka chehra taken

jawaniyon ke nainon se prit ke chalte ban

aaj us pyar bhare

jawan jiyon ka arman kahan hai

main hun jis ka shaer

wo insan kahan hai

wo insan kahan hai

aaj wo apni dharti apne jiwan ki barbaadi ki

tayyari mein

weyast hai masruf hai gum hai

bachchon ke komal badan ke TukDe

hathiyaron ke widhan ki jhaDiyon jangalon mein

la-waris lashen

jin ko

murdar-KHor peT bhare jaanwar

khae bina hi guzar jaen

phir khain kyunkar

koi batae

kitni ibaadat-gahen

mandir

masjid

girja ghar aur gurudware

kitni jaldi Dhae ja sakte hain

ya in sab ko halakaton ke saz aur aslahon ka

godam bana dena behtar hai

be-gunahon ka lahu zamin mein jazb nahin ho sakta

shayad kabhi nahin

koi batae

kab ye zamin dobara shola-zar banegi

kya koi nahin hai

koi nahin?

jo apni zamin ko zindagi ki jannat bana sake

ek insani taqat

himmat ek azm ke sath

des des mulkon mulkon

main insan ko lalkaronga

lekin main hun jis ka shaer

wo insan kahan hai

sari duniya jise manti rahi hai wo bhagwan kahan hai?