aaj lagta hai samundar mein hai tughyani si

aaj lagtā hai samundar meñ hai tuġhyānī sī

jaane kis dahr se aayā hai ye tūfān-e-balā

ye jo tūfān ki is meñ haiñ khañDar ḳhvāboñ ke

TūTte ḳhvāb haiñ dhundlī sī guzargāhoñ ke

an-kahī koī kahānī koī jaltā aañsū

aa ke dāman pe Thahartā huā be-kal shikva

chup sī sādhī hai mire but ne

magar āñkhoñ meñ

mere har tāj-mahal kī hai haqīqat vāzeh

jis meñ rahtī hai vo shahzādī jise qudarat ne

dil dhaḌaktā huā baḳhshā hai badan patthar kā

maiñ ne dekhā hai ki vo raat ke añdhiyāroñ meñ

apne TuuTe hue par ḳhud hī jilā detī hai

apne ashkoñ ke diye ḳhud hī bujhā detī hai

ḳhud hī apne liye likhtī hai sazāoñ kī kitāb

apne hāthoñ se chhupā detī hai zaḳhmoñ ke gulāb

aaj lagtā hai samundar meñ hai tuġhyānī sī

aaj larzish sī hai pairoñ meñ thakan sāñsoñ meñ

kirchiyāñ chubhne lagī haiñ jo mirī āñkhoñ meñ

aaj lāzim hai ki chup-chāp guzar jaa.e shaam

koī aahaT ho na dastak na hī chhilke koī jaam

aaj ā.īne se katrā ke guzar jaanā hai

aaj shab ghor-añdhere meñ utar jaanā hai

phir nayā din na.ī muskān jagā lā.egā

shab kā tūfān kināroñ se utar jā.egā

aaj lagtā hai samundar meñ hai tuġhyānī sī

aaj lagta hai samundar mein hai tughyani si

jaane kis dahr se aaya hai ye tufan-e-bala

ye jo tufan ki is mein hain khanDar KHwabon ke

TuTte KHwab hain dhundli si guzargahon ke

an-kahi koi kahani koi jalta aansu

aa ke daman pe Thaharta hua be-kal shikwa

chup si sadhi hai mere but ne

magar aankhon mein

mere har taj-mahal ki hai haqiqat wazeh

jis mein rahti hai wo shahzadi jise qudarat ne

dil dhaDakta hua baKHsha hai badan patthar ka

main ne dekha hai ki wo raat ke andhiyaron mein

apne TuTe hue par KHud hi jila deti hai

apne ashkon ke diye KHud hi bujha deti hai

KHud hi apne liye likhti hai sazaon ki kitab

apne hathon se chhupa deti hai zaKHmon ke gulab

aaj lagta hai samundar mein hai tughyani si

aaj larzish si hai pairon mein thakan sanson mein

kirchiyan chubhne lagi hain jo meri aankhon mein

aaj lazim hai ki chup-chap guzar jae sham

koi aahaT ho na dastak na hi chhilke koi jam

aaj aaine se katra ke guzar jaana hai

aaj shab ghor-andhere mein utar jaana hai

phir naya din nai muskan jaga laega

shab ka tufan kinaron se utar jaega

aaj lagta hai samundar mein hai tughyani si