aaj tera KHat jo mila

maiñ bahut duur thā tanhā thā

mere dil kī tasallī ke liye

ham-navā mere

mujhe aaj terā ḳhat jo milā

dard-bharī baat milī

jazba-e-iḳhlās milā

mere mahbūb

vafāoñ kā jahāñ-tāb-o-karam

terī ma.asūm mohabbat ke taqāzoñ meñ rahe

dil ke naġhmoñ pe rahe pyaar ke gītoñ pe rahe

hai ḳhushī mujh ko

mujhe husn-e-vafādār milā

ai sabā jhuum ke chal

tujh ko chaman-zār milā

hai ye āġhāz-e-safar

hai ye tamhīd-e-vafā

duur hai takmīl is kī

raah dushvār hai mohtāt chaleñ

hādse aa.eñ bhī to azmat-e-ulfat ke liye

bārhā gir ke bhī ham uTh ke chaleñ

taaki hālāt ke aage hameñ jhuknā na paḌe

kisī armān ko siine meñ sisaknā na paḌe

dil meñ jo pyaar ke jazbāt haiñ

ābād raheñ

mere is ḳhat ke ye alfāz tujhe yaad raheñ

main bahut dur tha tanha tha

mere dil ki tasalli ke liye

ham-nawa mere

mujhe aaj tera KHat jo mila

dard-bhari baat mili

jazba-e-iKHlas mila

mere mahbub

wafaon ka jahan-tab-o-karam

teri masum mohabbat ke taqazon mein rahe

dil ke naghmon pe rahe pyar ke giton pe rahe

hai KHushi mujh ko

mujhe husn-e-wafadar mila

ai saba jhum ke chal

tujh ko chaman-zar mila

hai ye aaghaz-e-safar

hai ye tamhid-e-wafa

dur hai takmil is ki

rah dushwar hai mohtat chalen

hadse aaen bhi to azmat-e-ulfat ke liye

barha gir ke bhi hum uTh ke chalen

taki haalat ke aage hamein jhukna na paDe

kisi arman ko sine mein sisakna na paDe

dil mein jo pyar ke jazbaat hain

aabaad rahen

mere is KHat ke ye alfaz tujhe yaad rahen