aaKHir kaun hain ye log

hamārī soch kaale dā.eroñ meñ ulajh chukī hai

ham nahīñ jānte ki vo hamāre ās-pās hī haiñ

jinhoñ ne parindoñ ke giit gaane par

pābandī lagā dī

ye vahī log haiñ jinhoñ ne canvas par

chābī banāne vāloñ ke haath kaTvā diye

ye vahī log haiñ inhī logoñ ne

samundarī machhliyoñ ko bandī banāyā

aur jugnūoñ se un kī izzateñ pāmāl karvā.ī

inhī logoñ ne titliyoñ ke rang churā liye

aur kā.enāt ko be-rang kar diyā

yahī vo log haiñ jinhoñ ne gaalī ko

aaj kā qaumī tarāna banāyā

inhī logoñ ne ḳhudā hone kā da.avā kiyā

yahī vo qātil haiñ jinhoñ ne

har rangīn ḳhayāl kā qatl kiyā aur use

shahādat jaise aziim e.azāz se navāzā

yahī haiñ vo jinhoñ ne hamārī sochoñ ko uljhā kar hamārī lāshoñ kī tijārat kī

āḳhir kaun haiñ ye log

hamari soch kale daeron mein ulajh chuki hai

hum nahin jaante ki wo hamare aas-pas hi hain

jinhon ne parindon ke git gane par

pabandi laga di

ye wahi log hain jinhon ne canwas par

chabi banane walon ke hath kaTwa diye

ye wahi log hain inhi logon ne

samundari machhliyon ko bandi banaya

aur jugnuon se un ki izzaten pamal karwai

inhi logon ne titliyon ke rang chura liye

aur kaenat ko be-rang kar diya

yahi wo log hain jinhon ne gali ko

aaj ka qaumi tarana banaya

inhi logon ne KHuda hone ka dawa kiya

yahi wo qatil hain jinhon ne

har rangin KHayal ka qatl kiya aur use

shahadat jaise azim eazaz se nawaza

yahi hain wo jinhon ne hamari sochon ko uljha kar hamari lashon ki tijarat ki

aaKHir kaun hain ye log