aaKHiri din se pahle

aur dekho ye vo shaḳhs hai jo azal se yūñhī chal rahā hai

yūñhī jāgte meñ bhī chaltā hai sote meñ bhī

is ke ik haath meñ qurs-e-mahtāb hai dūsre

haath meñ kurra-e-arz hai paañv talvār kī dhaar par haiñ

aur dekho ki asmāt meñ bhiiḌ hai ye vahī log haiñ

jo nahīñ jānte haiñ ki vo kuchh nahīñ jānte

aur dekho ki vo shaḳhs jo nekiyoñ aur gunāhoñ ke misqāl

uThā.e hue chal rahā hai vo ye jāntā hai ki is bhiiḌ

meñ kuchh khule log haiñ kuchh chhupe log haiñ vo kisī

lamhe us shaḳhs par apnī jaltī huī muTThiyāñ pheñk deñge

vo dhamāke chhupā.e hue muTThiyoñ meñ khaḌe haiñ

aur dekho agar kurra-e-arz aur qurs-e-mahtāb ko

rakkheñ mīzān meñ ek jānib udhar un dhamākoñ

ko rakkheñ to donoñ barābar hī nikleñge lekin

ye insāf kaise ho? andhā to mīzān usī vaqt

uThā.egā jab ki vo shaḳhs pul se salāmat guzar jaa.e

andhe ne kab se munādī yahī kar rakhī hai

lāThī se anjān ko bhī muāfī nahīñ mil sakegī

aur dekho ki vo log jo jānte haiñ ki vo jānte haiñ

rassiyāñ un kī lambī haiñ vo is liye to andhe hī

ko baḳhshte haiñ na lāThī ko

un ke diloñ par samā.at basārat pe mohreñ lagī haiñ

aur dekho ki ye pul bhī kaisā hai ḳhalā us ke uupar hai

nīche añdherā hai donoñ sire us ke zulmāt meñ haiñ

vo jo kahte haiñ zulmāt ke nīche murdoñ kī ik saltanat hai

kyā vo ye nahīñ jānte haiñ ki murdoñ kī vo saltanat kis jagah hai

kyā vo ye nahīñ jaate haiñ ki vo shaḳhs vo ḳhud haiñ

un ko jatā do adam kā ḳhalā aur murdoñ kī saltanat to

yahīñ hai tumhārī khulī aur chhupī muTThiyoñ meñ!

aur dekho ye wo shaKHs hai jo azal se yunhi chal raha hai

yunhi jagte mein bhi chalta hai sote mein bhi

is ke ek hath mein qurs-e-mahtab hai dusre

hath mein kurra-e-arz hai panw talwar ki dhaar par hain

aur dekho ki asmat mein bhiD hai ye wahi log hain

jo nahin jaante hain ki wo kuchh nahin jaante

aur dekho ki wo shaKHs jo nekiyon aur gunahon ke misqal

uThae hue chal raha hai wo ye jaanta hai ki is bhiD

mein kuchh khule log hain kuchh chhupe log hain wo kisi

lamhe us shaKHs par apni jalti hui muTThiyan phenk denge

wo dhamake chhupae hue muTThiyon mein khaDe hain

aur dekho agar kurra-e-arz aur qurs-e-mahtab ko

rakkhen mizan mein ek jaanib udhar un dhamakon

ko rakkhen to donon barabar hi niklenge lekin

ye insaf kaise ho? andha to mizan usi waqt

uThaega jab ki wo shaKHs pul se salamat guzar jae

andhe ne kab se munadi yahi kar rakhi hai

laThi se anjaan ko bhi muafi nahin mil sakegi

aur dekho ki wo log jo jaante hain ki wo jaante hain

rassiyan un ki lambi hain wo is liye to andhe hi

ko baKHshte hain na laThi ko

un ke dilon par samaat basarat pe mohren lagi hain

aur dekho ki ye pul bhi kaisa hai KHala us ke upar hai

niche andhera hai donon sire us ke zulmat mein hain

wo jo kahte hain zulmat ke niche murdon ki ek saltanat hai

kya wo ye nahin jaante hain ki murdon ki wo saltanat kis jagah hai

kya wo ye nahin jate hain ki wo shaKHs wo KHud hain

un ko jata do adam ka KHala aur murdon ki saltanat to

yahin hai tumhaari khuli aur chhupi muTThiyon mein!