aaKHiri KHwahish

nazmoñ kī kitāb meñ

logoñ ko us kī āḳhirī ḳhvāhish milī

us ne likhā thā

merī āñkheñ us gulū-kār ko de denā

jo apne maddāh aur rañg dekhnā chāhtā ho

aur merā dil is mujassama-sāz ke liye hai

jo apnā dil kisī mujassame meñ rakh ke bhuul gayā ho

mere haath us mallāh kī amānat haiñ

jis ke haath un dinoñ kaaT diye ga.e the

jab kashtiyāñ jalā dī ga.iiñ

aur dariyā paar karānā sab se baḌā jurm thā

us ne kuchh logoñ ko dūsre kināre tak pahuñchā diyā

vāpsī pe sarkārī kārinde us ke muntazir the

vo apne hāthoñ ke baare meñ kuchh nahīñ batātā

magar maiñ un logoñ meñ shāmil thā

jo us kī kashtī meñ dūsre kināre tak ga.e the

āñkheñ dil aur haath

kisī bhī shaḳhs ko zinda rakh sakte haiñ

aur maar sakte haiñ

nazmon ki kitab mein

logon ko us ki aaKHiri KHwahish mili

us ne likha tha

meri aankhen us gulu-kar ko de dena

jo apne maddah aur rang dekhna chahta ho

aur mera dil is mujassama-saz ke liye hai

jo apna dil kisi mujassame mein rakh ke bhul gaya ho

mere hath us mallah ki amanat hain

jis ke hath un dinon kaT diye gae the

jab kashtiyan jala di gain

aur dariya par karana sab se baDa jurm tha

us ne kuchh logon ko dusre kinare tak pahuncha diya

wapsi pe sarkari karinde us ke muntazir the

wo apne hathon ke bare mein kuchh nahin batata

magar main un logon mein shamil tha

jo us ki kashti mein dusre kinare tak gae the

aankhen dil aur hath

kisi bhi shaKHs ko zinda rakh sakte hain

aur mar sakte hain